Shillong, K’lyngkot, 19: Uwei u rangbah katba u ïaid lynti na khlaw ka shnong Nongpoh kaba hap hapoh ka dong Lumsohphoh, Ribhoi District ha ka 17 tarik mynta u bnai ha ka por kumba 4:00 baje janmiet u la lap kynsan ïa kawei ka metïap jong kawei ka longkmie ïa kaba ym shym pat lah ban ithuh bad kaba la sdang ban pyut.
Mar mar u la pyntip noh sha ki bor shnong bad na ka liang ki bor pynïaid shnong ki la pyntip noh sha ki Pulit.
Na ka liang ki Pulit ka Nongpoh ki la pyntip ruh sha ka Forensic Crime Scene Unit ban pynlong ïa ka jingtohkit bad ïa ka metïap la pynkit noh sha Civil Hospital, Nongpoh.
Kham hadien katto katne la ïoh jingtip ba ka metïap ka dei kawei ka Longkmie kaba na kawei pat ka shnong kaba marjan bad hadien ba la ban pyntip sha ki bahaïing, na ka liang ki bahaïing ki la ithuh ïa ka met lyngba ki jingdeng ha ka met.
Ki bahaïing ki la pyntip ba kane ka longkmie ka la phet na la ïing bad kam kwah shuh ban leit phai sha la iing watla ki bahaïing ki la pyrshang ban khot ïa ka.
Ki bahaïing ki la pynpaw ba kim shym la don kano kano ka jingtharai sniew halor kane ka jingjia katba na ka liang ki Pulit ki dang ap ïa ka kaiphod jong ka postmortem khnang ban tip ïa ka jingshisha.
