Shillong, Jylliew, 02: Hadien ka jingwad kaba phra sngi, ki ki kynhun ba kynthup na ka tnat Pulit, SDRF, SOT bad ka West Jaiñtia Hills District Adventure Mountaineering Club ki la lap ïa ka met ïap jong u Raja Raghuvanshi na kawei ka riat kaba don harum jong ka Parking Lot ha Wei Sawdong ha Riat Arliang ha ka por kumba 11:48 baje mynstep ka Lah Sngi u Blei.
U Superintendent of Police ka East Khasi Hills Bah Vivek Syiem ha u kyrwoh ba la phah sha ki lad pathai khubor u la pyntip ba ki Pulit ki la register kum ka ‘Murder Case’ ïa kane ka jingjia.
“La thaw ruh ïa ka Special Investigation Team (SIT) ban pynlong ïa ka jingtohkit bad ïa ki jingtip kiba bniah yn sa nang pyntip namarba ka jingtohkit ka dang ïaid shakhmat,” la ïathuh u SP.
Kum ban shu pyntip hangne ba ki shikurim, ka Sonam bad u Raja Raghuvanshi ki nongwan jngohkai pyrthei na Indore, Madhya Pradesh ki la jahrngai naduh ka 23 tarik Jymmang, 2025 katba ki dang wahsah kai honeymoon sha Sohra.
Ïa ka metïap jong u Raja la ïohi lyngba ka Drone ba la pynher da ki Pulit, la pyntip
Namar ka jingjylliew ka riat, ïa ka met la tan shajrong ka Parking Lot na ka bynta ban ïoh pynlong shwa ïa ka jingtohkit da ka Magistor ba la leh da ka Executive Magistrate, Sohra ka Kong Adiel R. Kynta, MCS hapdeng ka por 3:30 baje haduh ka por 4:00 baje nohphai sngi, la pyntip u SP.
Ïa ka jingtohkit la leh da ka jingdon lang jong ki nongsakhi na ka thaiñ. Ki bahaing hasem jong u ba ïap ki la ithuh ïa ka met ba ka dei jong u Raja Raghuvanshi lyngba ka Tattoo ha ka kti ka mon kaba la thoh, ““Raja.” Ki Pulit ki la lap ruh na ka jaka ba la lap ïa ka metïap ïa ka sopti Shirt kynthei, u snep dawai kuli Pentra 40, ka bynta jong ka LCD screen jong ka Vivo Mobile Phone bad ka Smart Watch na ka kti jong uba ïap, ong u kyrwoh.
Ïa ka met la pynkit noh sha NEIGRIHMS Hospital, Shillong, ban leh ïa ka post-mortem examination khnang ban tip ïa ka daw tynrai halor ka jingïap. Ki Pulit ki dang pynlong ïa ka jingtohkit kaba bniah bad pyntip ruh ba kam don satia kano kano ka jingsuba ba un shah pynïap, ong u SP ha u kyrwoh.
“Haduh mynta ym pat lah satia ban lap ïa ka Sonam Raghuvanshi. Ka jingwad ïa ka met ka dang ïai bteng lyngba ka jingtrei shitom jong ki Pulit kiba dang pynlong ïa ka jingwad sha ki riat, ki lum ki them wat hapdeng ka jingther jong u lapbah ha kine ki khyndiat sngi,” la pyntip u SP.
