Shillong, Naitung, 30: Ki dkhot jong ka Khasi Students Union, Mawprem Circle kiba dang pynlong ïa ka jingkhynra nongbylla bar jylla ha ka thaiñ Mawprem ha ka sngi Baar ki la ïoh bat katto katne ki khynnah bar jylla ha ka thaiñ Jhalupara kiba dang muja ka injek drok haba shit haba shai khlem jingsalia.
Hadien ba la ïohbat ïa ki, ka seng ka la aiti noh sha ki Pulit ka Jhalupara Outpost ban leh ïa kaba donkam.
U samla Pynshain Lyngdoh Lyngkhoi, ha u kyrwoh ba la phah sha ki lad pathai khubor u la ong, “dei ka jingtlot jong ka Sorkar ba sa ïoh rung laitlan u drok ha ka jylla jong ngi. Kumta la donkam ban pyntrei hok ïa ka Meghalaya Residents Safety and Security Act (MRSSA) bad la donkam ba ngin ïoh noh ïa ka Inner Line Permit (ILP) ka ban ïada ïa ngi ki ritpaid.”
