Shillong, Nailar, 11: Ka Khasi Students Union(KSU) Laban Circle ha step sngi U Blei ka la ïoh bat ïa ar ngut ki briew kiba dei ki Muslim na Oxford Hills kaba hap hapoh u pud u sam jong ka Dorbar Shnong Kench’s Trace Oxford Rilbong.
Ha u kyrwoh ba la phah da u Information and Publicity Secretary ka KSU Laban Circle u Franky Rani, la pyntip ba ha ka jingtohkit kaba bniah ka KSU ka lap ba kine ki briew kim don ïa ki kot ki sla kiba biang hynrei la wan ïalam ïa ki ban trei bylla ha kawei ka ïing ha Oxford.
Ka KSU kaba la leit khynra ha ka ïing ka lap sa 4 ngut ki Muslim ki bym don kot don sla, ki dei ki briew kiba wan sha kane ka jylla kum ki nongjngohkai hynrei ka jingthmu jong ki pat ka long ban wad jaka riehtngen ha kane ka jylla ba la ïarap da uwei u briew uba la tip kyrteng kum u Shajahan Ali uba na Assam bad uba sah ha Laban, u dei ma uba pynbiang jingtrei ïa kine ki briew.
Ka KSU ka la leit aiti noh ïa kine baroh sha ki Pulit jong ka Rilbong Beat House.
Ha ka step kaba bud, kata, ha ka Lah Sngi U Blei, ka KSU ka la leit kyndang ha ïing sah jong u Shajahan Ali bad ka la beh krad syndon ïa une u briew uba kam ba u dei u kontraktor bad uba ju mlien ban wanrah nongbylla nabar jylla.
Ka KSU ka la maham ruh îa ki trai îing ba kim dei shuh ban dang ai wai ïing ïa u Ali bad ïa kiwei pat kiba wan nabar jylla namarba ym lah ban tip ïoh ki dei pynban ki briew kiba la shah beh na Assam.
Ka KSU ka la maham ruh ïa ki Muslim kiba shong basah ha Laban ba kim bit ban ai jaka rieh tngen ïa ki Muslim kiba wan nabar jylla bad ka seng ka la kyntu ruh ïa ki trai iing ba ki dei ban shimkhia bha ïa kane bad ka KSU ka la maham ba lada lap kan leh da kaba tyngeh.
