Shillong, Nailar, 06: Ka State Disaster Response Force (SDRF) ha ka sngi Balang ka la lap ïa ka met jong u ophisar Agriculture u Teseng M Sangma na ka Banseng Wari kaba don sharum jong ka wah Ganol.
Ha ka jingbteng ban wad ïa ka met mynta ka step, ka kynhun SDRF ka la ïakynduh ruh bun ki jingeh bad ki jingshah tynjuh ban lap ïa ka met jong uba ophisar uba la ïap namarba ka la sahkut hapdeng khapmaw bad na ka jingkhlaiñ palat ki lat lat jong ka um kaba buh jingma ruh ïa ki dkhot ka SDRF.
Ïa ka met, la ïoh ban shimti na wah da kaba pyndonkam da ki tyllai bad nange pat la ïoh rah sha ryngkew.
U Director ka Civil Defence u M,K Sangma uba don lang sha ka jaka ba la lap ai ka met u la ïarap ban ai jingmut ïa ka kynhun SDRF kumno ban ïoh sei ïa ka met.
Ka kynhun SDRF ka la ïakhun dohïap ban kit da ka met na Banseng Wari ïa ka metïap jong u ophisar ban pynpoi shajan surok hadien ba la hap ban ïaid ki khlaw ki btap.
ïa ka met jong u ophisar la rah beit beit sha Civil Hospital, Tura ban leh ïa ka postmortem.
Lah ban kdew hangne ba ka metïap jong u ophisar la lap sharum ka wah Ganol hadien saw sngi ba la wad da ka kynhun SDFR, ka Search and Rescue Team (SRT), ki Pulit bad ki nongshong shnong.
