Shillong, K’lyngkot, 10: Ki bahaing hasem ki la ujor sha ki Pulit ka Mawlai Police Station hadien ba ki la lap ia ka dien mong bad ka dak jngem snam ha ka met jong u samla Bipul Inghi uba la khladnoh khnang ba ki Pulit kin pynlong ia ka jingtohkit kaba bniah ban lap ia ka daw tynrai.
Une u samla u dei na ka shnong Khulia ha Ri Bhoi District.
Kane ka jingjia ka la jia ha ka janmiet 6 tarik mynta u bnai ha kaba la pyntip sha ki bahaïing ba u samla Bipul Inghi uba trei ha NEHU u la mynsaw jur ha kaba la kam ba u la shu kyllon hi ha madan.
Ia une u samla la pynkit noh sha Supercare Hospital Shillong ban ioh ia ka jingsumar hynrei une u samla u la khlad noh ha ka 8 tarik mynta u bnai.
Hadien ba la wanrah sha iing ia ka met, ha ka por ba la pynsum ia ka met, ki bahaing ki la lap pynban ba ka don ka dienmong ha ka met bad ka dak jngem sngam bad kane ka la pynsuba jur ba ka lah ban don kaei kaei kaba la jia sha lyndet.
Ha ka jingiakren bad ki lad pathai ha ka sngi Saitjaiñ ha Nongpoh, u Kñi jong ka kur Inghi u Bah Tisha Inghi bad u Rangbah Shnong u Bah Komin Ingtih ki la ong ba ha ka jingshisha kim don kano kano ka jingsuba sniew iano iano ruh hynrei dei tad hadien ba la wanrah ia ka met sha la ïing la lap pynban ia ka dienmong bad ka jingjngem snam ha ka met kaba la pynlong ia ki ban ujor noh da ka ejerhar sha ki Pulit ka Mawlai Police Station.
Ia ka met jong u samla Bipul la rah noh sha Civil Hospital Nongpoh ban leh ia ka post-mortem katkum ka jingkwah ki bahaing hasem.
