Shillong, K’lyngkot, 09: Da ka jingtrei shitom ki dkhot ka Khasi Students Union (KSU) Bengaluru Unit ban pynsaphriang ïa ka dur da kaba tah ïa ki poster bad ha social media, khatduh ïawai la lap ïa u Bah Chaltbha Muksor uba jah naduh ka 5 tarik u Kyllayngkot, 2026 bad uba la telephone khatduh sha la iing na Jolarpettai Junction Railway Station, Tamil Nadu.
U Bah Chaltbha Muksor uba dei u nongshong shnong jong ka Lad Rymbai, Dong Pohktieh, East Jaiñtia Hills District, Meghalaya u la mih na la shnong ha ka 2 tarik, Kyllalyngkot, 2026 bad ha ka por kumba 11:00 baje mynmiet u shong da ka Train ban leit bylla sha Bengaluru.
La lap ba ka jaka kaba u don khatduh eh ka dei ha Jolarpettai Junction Railway Station, Tamil Nadu, ha ka 5 tarik Kylllalyngkot, 2026 ha ka por kumba 6:00 baje mynstep bad naduh kane ka por, ki bahaing hasem kim shym la ïoh shuh ban phone namarba ka mobile jong u ka la lip.
Hadien ka jingpynsaphriang ka KSU ïa ka dur ha ka Social Media, ki Pulit ka Krishnagiri Police Station ki la pyntip sha u President ka seng u samla Donboklang Nongphud ba ki la lap ïa u Bah Chaltbha Muksor uba la don hapdeng ka jingmynsaw bad la pynkit noh ïa u sha Government Medical College and Hospital, Krishnagiri, ha ka 8 tarik, Kyllalyngkot, 2026 ha ka por kumba 3:00 baje noh phai sngi.
Ha Hospital, ki dkhot ka seng ki la lap ba u Bah Muksor u la mynsaw na ki bynta jong ka kjat bad u don ruh hapdeng ka jingsumar sukher jong ki bor pynïaid ka hospital da ka jingïarap jong ki dkhot ka KSU Bengaluru Unit.
Na ka liang jong ki bahaiing hasem u Bah Chaltbha Muksor bad ka KSU Bengaluru Unit ki pynpaw ka jingsngewnguh ïa u Superintendent of Police bad ïa u Sub-Inspector ka Krishnagiri Police Station bad kumjuh ruh ïa ki bor pynïaid ka Hospital bad ïa ki riewshimet kiba la ai jingïarap ban lap dien biang ïa u Bah Muksor.
