Shillong, ïaïong, 07: Ka kynhun Search and Rescue Team jong ka tnat Fire and Emergency Service ha ka Lah Sngi u Blei ka la ïoh sei ïa ka metïap jong uwei u rangbah briew na ka riat kaba jrong 200 mitar eiei ha ka shnong Umsaw-Mawjynrong kyntoit Wahkdait ha ka surok By-pass bathymmai jong ka shnong Mawlai.
U Rangbah Shnong jong ka shnong Umsaw Mawjynrong Bah Rapborlang Mawthoh ha ka jingïakren bad u nonglum khubor ka Batesi TV u la ïathuh ba ïa kane ka metïap la lap da ki rawon katba ki dang thmu ban leit khwai sha ka wah kaba don ha kane ka jaka ha kaba ki la pyntip noh mar mar sha u Secretary jong ka shnong Umsaw Mawjynrong, Shillong.
Uwei na ka kynhun ki rawon kiba la lap ïa kane ka met, u la ïathuh katba ki dang hiar sha wah, ka la wan shwa jingsma iwtung bad kham katto katne ki la lap ïa ka khlieh kaba la kylla skeleton bad sa ka met kaba pyut kaba la lait la ka jong ka jong.
La ïathuh ba une u rangbah uba la jah naduh ka 21tarik, Lber,2025 u dei uba shong basah ha ka shnong Umlyngka, Upper Shillong hynrei uba poi shongkha ha ka shnong Umsaw Mawjynrong.
Ïa ka met jong une u rangbah la pynkit noh da ki Pulit jong ka Mawlai Police Station sha Shillong Civil Hospital na ka bynta ban leh ïa ka post mortem shwa ban aiti pat sha ki bahaïing hasem ban pyndep ïa ka jinglehniam bakhatduh.
