Shillong, Jylliew, 09: Ka Hima Sohra, ka Elaka Saitsohpen, Elaka Mawmluh bad kiwei kiwei ki shnong ryngkat ki paidbah nongshong shnong ha ka 10 tarik Jylliew 2025 kin pynlong ïa ka Sohra Region Public Rally ban pynpaw ka jingsngewkhia halor ka jingshah kren beiñ bad shah kynnoh jong ki nongshong shnong jong ka Sohra ha kaba ïadei bad ka jingshah pynïap u Raja Raghuvanshi.
Ka jingpynlong ïa kane ka rally ka long hadien ba la pynshisha ba u Raja Raghuvanshi u la shah pynïap ha ka kurim lajong kaba la aiwai ha ki briew na ka jylla Madhya Pradesh bad Uttar Pradesh.
Kane ka jingïaid rally kan sdang na Ophis u Syiem ka Hima Sohra bad ssa pynkut ha Saitsohpen ha kaba kan don ka jingïalang bad ka jingthang mombati.
