Shillong, Lber, 05: Uwei u samla uba la don kumba 24 snem ka rta u la leit pyndem noh ha ki Pulit ka Ribhoi District hadien ba u ladep leh be-ijot ïa kawei ka longkmie kaba la 66 snem ka rta kaba la don ruh ïa ki khun ki ksiew ha kawei ka shnong kaba hap hapoh u pud u sam jong ka Ribhoi District.
Ha ka jingïakren bad ka Batesi TV, kane ka longkmie ka la ïathuh ba ha ka sngi u Blei mynta ka taiew ha ka por kumba 7-8 baje janmiet une u samla u la wan kai ha iing jong ka namarba u dei uba ju rung ju mih bha ha iing jong ka na ka por sha ka por bad ha kane ka sngi hadien ba ka ladep ai bam ïa u, u la leh pynban ïa kane ka kam pohjait da kaba ksih na ryndang bad set ïa ka shyntur jong ka bad hadien kata u la pantan ïa ka sha ka jaka khlaw kaba don kham pajih na iingsah bad leh ïa ka kam bymman.
Hadien kane ka jingjia, kane ka longkmie kaba la mynsaw ruh na ki bynta jong ka kti ka diang ka la leit wad jingsumar sha PHC ha ka sngi kaba bud, kata ha ka Lah Sngi u Blei bad na ka liang jong ki nongai jingsumar hapoh ka PHC ki la bthah ïa kane ka longkmie ba kan mudui da ka ejahar sha ki Pulit bad ha kaba ïadei bad kane ka jingjia, na ka liang jong ki khun ki kti ruh ki la pyntip ïa kane ka jingjia sha ki bor pynïaid shnong.
Ka la ïathuh ruh ba une u samla u la leit ban aiti noh ïalade sha ki Pulit ha ka 4 tarik mynta u bnai.
Kum ka jingsngewlem halor kane ka jingjia, ki paidbah nongshong shnong ki la mih shakhmat ban pynrem jur halor kane ka jingjia bad dawa ruh ïa ki bor jong ka aiñ ban leh da kaba tyngeh pyrshah ïa u runar uba donkti ha ka kam leh beijot.
