Shillong, Jylliew, 19: Ka Meghalaya Editors’ and Publishers’ Association (MEPA) ha ka sngi Balang ka la leh burom ïa ar ngut ki nongpathai khubor ka jylla kiba la ïoh khusnam ha ka ri India, kata, ïa ka Kong Alicia Bakor Phanwar bad ka Kong Princess Giri Rashir ha ka jingïalang kaba kyrpang kaba la long ha Shillong Club, Shillong.
Ha kane ka jingleh burom, ka MEPA ka la ai sngewbha ïa baroh ar ngut ki nongïoh khusnam da ka memento bad ka shithi ai burom.
Lah ban kdew hangne ba ka Kong Alicia Bakor Phanwar, 26 snem ka rta ka la ïoh pdiang ïa khusnam ENBA Gold Award for Best News Producer ha ka 30 tarik Lber, 2024. Ka dei kawei na ki nongpathai khubor ba dang khynnah tam kaba trei kum ka Shift Newsroom Supervisor ha ka India Today TV.
Ka Kong Princess Giri Rashir ka la ïoh ïa ka khusnam Ramnath Goenka Award for Excellence in Journalism ha ka 19 tarik Lber, 2024. Mynta ka trei kum ka nongpathai khubor na Meghalaya ïa ka East Mojo.
Ïa kane ka jingïalang leh burom ba la pynïaid da ka Treasurer jong ka MEPA ka Kong Banda Blah la sakhi lang da u President Bah R Monarch Shabong, u Vice President u Rajib Choudhury, ka Adviser Kong Patricia Mukhim u General Secretary ka MEPA u Bah John W. Thabah bad ki nongthoh khubor ka jylla.
Ha kaba kren ha kane ka sngi, i Kong Phanwar ka la ai khublei ïa ka MEPA namar kane ka jingleh burom bad ong ruh ba ka Meghalaya ka dei ban ïoh jaka ha ki lad pathai khubor jong ka ri India ha kaba ïadei bad ki mat bad ki jinglong jingman kiba ka jylla ka don.
Ka Kong Rashir ka la pynpaw ka jingsngewnguh ïa ka MEPA namar ka jingai burom kyrpang ïa ka jingïoh khusnam bad ka la ong ruh ba ka dei ka kamram ki nongpathai khubor ka Meghalaya ban sei ïa ki mat kiba ïadei bad u paidbah ka jylla khnang ba kita ki mat kin poi sha ka jingtip jong ki lad pathai khubor ha ka ri India baroh kawei.
