Shillong, Lber, 02: Ka seng ki trai truck bad ki nongniah truck ka South West Khasi Hills District kiba don hapoh ka shatri jong ka Meghalaya Truck Owner Driver Association ha ka Sngi Saitjaiñ ki la hiar sha ka shnong Kensohshan, Ranikor ban noh synniang da ki jain, ki nep ryngkat ka song pisa sha ki lanot pluh iing kiba la mad ïa ka jingjia ba sngewsih ha ka step jong ka 26 tarik Rymphang 2025.
Kine ki lanot ki dei na ka longiing jong u Bah Twinkle Pahsyntiew bad ka Kong Debora Thongni kiba don kumba 8 ngut ki khun kiba shong basah ha ka shnong Kensohshan.
Ka Meghalaya Truck Owner and Driver Association (MTO&DA) hapoh ka jingïalam jong u President u Bah Robinsing Wahlang ryngkat u Secretary u Bah Pailander S. Thongni ka la pynpaw ba kam dei ka seng tang jong ki kali hynrei kum ka kynhun ka ju kner ruh ïa la ki kti ban noh shynniang sha ki lanot haba ki mad ïa kino kino ki jingjia basngewsih da kaba lum ïa u synniang tang na ki para dkhot.
