Shillong, Jylliew, 09: Ar taiew ba ka la jah rngai hadien ka jingïap jong u tnga, u Raja Raghuvanshi, ka Sonam ka la poi sha Uttar Pradesh ban leit aiti ïa lade ha ki Pulit ka Ghazipur District.
U Myntri ka tnat Kam Pohiing ka Sorkar Jylla u Bah Prestone Tyngsong ha ka jingïakren bad ki lad pathai khubor ha ka lah Sngi u Blei u la pynthikna ïa ka jingleit aiti jong ka Sonam ha ki Pulit ka Uttar Pradesh.
U Superintendent of Police ka East Khasi Hills Bah Vivek Syiem u ïathuh ba ki Pulit ki la ïohkem shwa ïa uwei uba donkti uba la tip kyrteng kum u Akash Rajput, 19 snem na Lalitpur. Hadien kane, ki Pulit ki la kem ruh sa ïa u Vishal Singh Chauhan, 22 snem bad ïa u Raj Singh Kushwaha, 21 snem kiba dei na Indore.
Ïa ka met jong u Raja Raghuvanshi, la lap na ka riat Mot Arliang kaba don hajan ka Wei Sawdong ha Sohra ha ka 2 tarik mynta u bnai. Na ka jaka ba la lap ïa ka metïap, ki Pulit ki lap ruh ïa ka wait ba dang thymmai ïa kaba la suba ba ka dei ka tiar ba la pyndonkam ban pynïap ïa u Raja Raghuvanshi.
Hadien kane ka jingjia, ka Sonam Raghuvanshi ka la jahrngai naduh ka 23 tarik, Jymmang, 2025.
U Bah Syiem u la ïathuh ba ka Sonam bad ki briew kaba la ai wai ban pynïap ïa u kurim ki la phet na Shillong ha ka 23 tarik, Jymmang tang shu dep pynïap ïa u Raja Raghuvanshi ha kane kajuh ka sngi.
Ki Pulit ki la thaw da ka Special Investigation Team (SIT) ban pynlong ïa ka jingtohkit kaba bniah halor kane ka jingjia bad register case kum ka case pynïap briew. Hapoh hynñiew sngi, ka SIT ka la ïohlum ïa ki sakhi sabut bad ithuh ruh ïa ki briew kiba la suba ba ki dei kiba donkti ha kane ka jingjia.
Na ki jingtohkit ka paw ba dei u Raj Kushwaha uba donkti da ka jingïasylla bad ka Sonam.
Ka kynhun jong ki Pulit na ka SIT kiba don mynta ha UP ki dang ap ïa ka jingai jingbit na ka Kashari ban ïoh wanrah sha ka nongbah Shillong ïa ka Sonam kynthup ruh ïa kiba donkti shwa ban tian bishar ha Kashari ha nongbah Shillong khnang ban ïoh pynlong ïa ka jingtohkit kaba bniah halor kaei ka daw kaba pynlong ïa ka Sonam kat haduh ban dkhat jubor ïa ka jingim jong u tnga uba ka dang shu dep ïathoh shongkurim da ka jingïamynjur lang jong ka ïing ka sem.
Ki jingshisha baroh kin sa nang paw pyrthei ha kine ki shi sngi ar sngi tad ynda ki Pulit ki la ïohbor na ka Kashari ban pynlong ïa ka jingtohkit kaba bniah halor kane ka jingjia.
U Bah Prestone u la ai khublei ruh ïa ka NDRF, SDRF, SRT, SOT, SIT kynthup ruh ïa kiwei kiwei ki kynhun kynthup ruh ïa ki dorbar shnong bad ki paidbah nongshong shnong kiba don bynta lang ban wad ha ban da lap ïa ka met jong u Raja Raghuvashi.
 | ReplyForwardAdd reaction |
