Shillong, Nailar, 19: Ka Meghalaya State Commission for Protection of Child Rights (MSCPCR) ka la pynpaw ïa ka jingsngew khia kaba khraw halor ka jingshah thombor jong kawei ka khynnah skul, 15 snem ka rta ha Jaïaw, Shillong bad ka la ong ba ki Pulit ki dang pynlong ka jingthwet kaba jur ban ïoh kem ïa ki nongleh kam bymman.
Kane ka jingjia hadien ba arngut ki runar kiba la tap ka durkhmat ki la injek da u thyrnia injekshon ïa ka khynnah ba la suba ba u dei u drok shwa ban phet krad na katei ka jaka.
Ka Chairperson ka Agatha Sangma ka la pynpaw ba kane ka long ka jingjia kaba “pynkyndit” bad ka la banjur ïa ka jingdonkam ban ïatreilang ban pynthikna ïa ka jingshngaiñ jong ki khynnah.
“Ngi kwah ban don ïa ka jylla ha kaba ki khynnah kin shngaiñ, bad ban lah ban leit skul da kaba shngaiñ ka dei ka hok jong iwei pa iwei i khynnah,” la ong u Sangma.
Ka Chairperson ha ka sngi Baar ka la leit jngoh ïa ka khynnah bad ka la ïakren bad ka da kaba ïaroh ïa ka jingshlur ban leit wad jingsumar mar mar hadien ka jingshah dung thynia injek.
Ka Sangma ka la pynskhem ïa ka jingdonkam ban don ki CCTV kiba treikam bad ka jingpeitngor kaba kham bha ha ka jylla.
“Ngi hap ban thaw ïa ki jingpeitngor kiba kham bha shibun ha ka jylla jong ngi, kumjuh ruh ngi dei ban don ïa ka rukom pahara kaba kham bha,” ka la ong.
Watla ki don ïa ki CCTV ba la pyndait ha katei ka jaka, hynrei ka Sangma ka la pyntip ba ïa ki dur ym pat lah ban ïoh ïa mynta, bad ka khynnah kam shym la lah ban ithuh ïa ki nongthombor namar ba ki deng ïa ka mask bad ki kup da ki helmet.
“Ki Pulit ki dang tohkit bad bishar bniah ïa kane ka kam,” la ong ka Sangma haba pynpaw ïa ka jingshaniah ba shen yn sa ïoh kem ïa ki nongleh kam bymman.
Ka Chairperson jong ka Commission ka la kyrpad ruh ïa ki khynnah ba kim dei ban duh mynsiem na kane ka jingjia bad ba kin ïai bteng ban leit skul khlem jingshep tieng. Ka la ban jur ba watla kane ka jingjia ka long kaba sngewkhia, hynrei ki khynnah ha Meghalaya ki sngewshngaiñ haba ki leit skul.
Ka Sangma ka la banjur ïa ka jingdonkam ban don ka jingïatreilang hapdeng ka Sorkar bad ka imlang sahlang ban wanrah ïa ka jingsngewthuh jingmut bad ban pynlong ïa ka imlang sahlang ban kham sngewkhia ïa ka jingshngaiñ jong ki khynnah.
