Shillong, Naitung, 09: Ha ka jingleit jurip ba kyndit, u Symbud Myntri Rangbah uba khmih ïa ka tnat Pynroi Sori u Bah Sniawbhalang Dhar u la leit jurip ha ka por janmiet ïa ka Khyndai Lad kaba long ka kad khaii ba heh tam ha ka jylla.
Ka jingleit jngoh la long na ka bynta ban bishar ïa ka jingshngaiñ bad ka jinglong jingman ha ka por mynmiet ha kane ka jaka, kaba la kylla long ka jaka jngohkai kaba khring bha ïa ki nongjngohkai pyrthei.
Ha ka jingleit jurip, u Bah Dhar u la ïakynduh bad ki nongdie jingbam harud surok bad ki briew kynthup ïa ki nongjngohkai pyrthei kiba dang ïoh mad ïa ki jingbam jong ka thaiñ.
U la mad ruh katto katne ki jingbam ba la die ha kane ka iew.
U Bah Dhar u la banjur ba ka jingdon jong ki briew ha Khyndai Lad ha ka por mynmiet ka long ka jingpynshisha ïa ka nongbah Shillong bad ka Meghalaya kum ka jaka ba shngaiñ.
U la sngewnguh ba ki nongshong shnong bad ki nongjngohkai pyrthei kumjuh ki sngew shngaiñ ban shangkai mynmiet hapoh ka nongbah.
U Symbud Myntri Rangbah u la kdew ba ka jingshaniah jong ki paidbah ha ka Sorkar ka paw ha ka jingkwah jong ki ban leit shabar bad ban sngewtynnad ïa ka jingïaid kai ha ka por mynmiet jong ka nongbah. Kane, u la ong, ka dei ka dak kaba bha jong ka Sorkar ban pynneh ïa ka suk ka saiñ ha ka jylla.
Katkum ka jingong jong u, ka jingpyrshang jong ka Sorkar ban pynthikna ïa ka jingshngaiñ bad jingsngewtynnad na ka bynta ki nongshong shnong bad ki nongjngohkai pyrthei kumjuh ka la ïarap ïa ka nongbah Shillong ban nang kiew shaphrang kum ka jaka jngohkai pyrthei.
