Shillong, Naiwieng, 19: U Election Commissioner of India u Dr. Sukhbir Singh Sandhu, u la leit jngoh ïa u Lum Sohpetbneng ha ka sngi Balang ryngkat ka jingsynran lang ka kurim jong u bad ki heh ophisar ba kynthup ïa u Deputy Commissioner jong ka Ri Bhoi District u Abhilash Baranwal bad u Chief Electoral Officer ka Jylla Meghalaya u Dr. BDR Tiwari
Mar ïa poi ha Lum Sohpet Bneng ïa u Election Commissioner la pdiang burom da ki nongmihkhmat ka Seng Khasi Kmie u Bah D.L. Nongbri, u Vice President Bah Païa.B. Synrem, u Asst. Secretary ryngkat bad ki dkhot ka Jylli Pyrkhat Kam bad ka Komiti Lum Sohpetbneng, Seng Khasi Kmie.
U Dr. Sandhu uba la wan iuhkjat na ka bynta ki kam ka Sorkar ha kane ka Jylla, u la leit siew sha u Lum Sohpet Bneng ban duwai bad phirat bad ban pan ïa ka jingkyrkhu na U Blei Trai Kynrad Nongbuh Nongthaw.
Ha kane ka jingleit jngoh, la aiti ha u ïa ki kot kiba pyni ïa ka jingkordor bad ka pateng jong u Lum Sohpet Bneng bad ka rukom im ki Khasi.
U Dr. Sandhu u la ïashim bynta ruh ha ka jingïakren kaba lyngkot kaba don jingmut bad ki Rangbah jong ka Seng Khasi, kiba la ïasam ïa ki jingshemphang halor ka rukom pyrkhat, ka jingdonkam ha ka kolshor, bad ka pateng ba kynja mynsiem jong u Lum Sohpetbneng.
U la ïaroh ïa ki riti dustur bad ki jingriewspah ka lariti ba la pynneh pynsah da ka Seng Khasi.
