Shillong, Rymphang, 28: Ka jingpyrshang jong ki Pulit Assam ban pynlong ka jingkhynra ha University of Science and Technology, Meghalaya kaba don ha ka shnong Killing ka la pulom hadien ba ki Pulit jong ka Ri Bhoi District ki la kyntait mardor ban ai jingbit.
Katkum ka khubor ba la ïohlum, la ïathuh ba ki Pulit ka jylla Assa ki la thmu ban pynlong ïa ka jingkhynra ha kane ka skulbah ha kaba ïadei bad jingshah kem jong u Chancellor ka USTM u Mabubul Hoque halor ka jingjia ba dang shen.
U Superintendent of Police jong ka Ri Bhoi u V.S. Rathore u la ïathuh ba shi kynhun ki Pulit jong ka jylla Assam ki la wan poi ha Khanapara Police Station ha Ri Bhoi ha ka 28 tarik Rymphang, 2025 ban pan jingïatreilang na ka bynta ban pynlong ïa ka jingkhynra hapoh ka skulbah USTM. Hynrei, hadien ba la bishar sani bha, ki Pulit jong ka Ri Bhoi ki la kyntait mardor ban ai ka jingïatreilang bad ki Pulit Assam ha kaba ki la hap ban shu leit phai thylli noh sha la ktem khlem da ïohlad ban leit iuhkjat wat tang hakhmat ka khyrdop jong ka USTM.
U SP u la ïathuh ba ka jingkyntait jong ki Pulit ka Ribhoi ban ïatreilang ha ka jingkhynra ka long na ka daw ka jingpynkhreh ïa ka jingwan iuhkjat jong ka Myntri ka Sorkar Pdeng kaba khmih ïa ka tnat Pla Tyngka ka Nirmala Sitharaman bad la bthah ruh ïa ki Pulit Assam ba ki dei ban da ïoh shwa ïa ka Search Warrant na ka Kashari shwa ban pyntyllun ïa ka kam shakhmat.
