Shillong, Jylliew, 19: Ki Pulit ki la kem noh ïa u Donald Sohtun halor ka jingkynnoh ba u dei uba donkti ban pynïap ïa ka kurim jong u ha ka iingsah wai ha Nongrah, Nonglum, Shillong.
“U briew uba la ithuh kum u Donald Sohtun u la shah kem hadien ba la leit ban aiti noh ïalade hakhmat ki Pulit,” la ïathuh u Superintendent of Police ka East Khasi Hills Bah Vivek Syiem ha ka jingïakren bad ki lad pathai khubor ha ka sngi Palei.
“Ngi la shim ïa kane kum ka jingjia ba kyrpang bad shen ngin sa pynngat kyndon ïa kane ka case,” u la ong.
U SP u la ïathuh ba katkum ka jingtohkit la lap ba u Donald Sohtun u la suba sniew ïa la ka kurim jong u ka Kong Priya Khongstia ba ka ïaid shynrang shawei nalor jong u.
“Ki la poi sha ka jingïania bad u la tied ïa ka (da u maw ka khlieh),” la bynrap.
U Donald Sohtun u la song ïa ka met ka kurim jong u hapoh ka nep syai bad phet ïalade na ka ing shongwai. Ïa ka met jong ka, la lap hadien lai sngi kane ka jingjia bad ïa ka ejahar la mudui ha ka 30 tarik, Jymmang.
Haba kylli, u SP u la ong ba ki Pulit bad ka kynhun ba leh ïa ka Forensic ki la leit mardor sha ka jaka ba la jia ban pynlong ïa ka jingtohkit.
Da ka jingïarap jong ki ksew, ki Pulit ki la lah ban lap ïa u maw, uba la pyndonkam kum ka tiar ba pynïap.
Ïa u Donald Sohtun ka kashari ka la ai bor ïa ki Pulit ban set ha Judicial Custody na ka bynta ban pynlong ïa ka jingtohkit.
