Shillong, K’lyngkot, 06: Ki dkhot jong ka North Eastern Hill University Students Union (NEHUSU) ha ka Lah Sngi u Blei ki la beh krad ïa u Registrar u Omkar Singh da kaba kynnoh ba u la shu wan rung sop sop shapoh kane ka skulbah khlem da pyntip ïano ïano ruh ne wat ïa u Vice Chancellor Incharge.
U President jong ka NEHUSU u samla Sandy Sohtun ha ka jingïakren bad ki lad pathai khubor u la ïathuh ba u Registrar u la wan rung shapoh ka skulbah ha ka por mynsngi da kaba ïalam lang ruh ïa kawei ka trok na ka bynta ban kit noh ïa ki tiar ki tiar bad ïa ki kot ki sla ba donkam na ka Quarter kaba u sah hapoh kane ka skulbah.
U la iathuh ba ki dkhot ka NEHUSU bad ka KSU ki la maham ruh ba um bit satia ban rung hapoh ka skulbah katba ka jingtohkit ka dang iaid shakhmat.
“Hynne mynsngi u Registrar u la wan iuhkjat hangne hapoh ka skulbah bad ha kine ki khyndiat sngi ba dang don hapdeng ka shuti ruh u la wan khlem da pyntip ïano ïano ruh. Tang shu ïoh jingtip ïa ka jingwanrung jong u hynne ka sngi, ngi la lum ïa ki paradkhot jong ka NEHUSU bad KSU bad ngi la khang tala ruh ka ophis ha Administration Block,” la ïathuh u President ka NEHUSU ha ka jingïakren bad ka Batesi Tv.
“Naduh ka 31 tarik, Nohprah, 2024 tad haduh mynta u bnai Kyllalyngkot, 2025 u la wan rung la lai siew saw sien sha kane ka skulbah,” la pyntip u President ka NEHUSU bad bynrap, “hadien ba ngi la khang tala ïa ka ophis ha Administration Block ngi la leit pat sa sha ka Quarter kaba u sah bad ngi la ïohi ba u dang lum ïa ki tiar ki tar bad ïa ki kot ki sla ba u donkam. Ngi la ïakren markhmat ba um dei ban wan hi da lade hynrei u dei ban phah pateng da kiwei pat bad ban pyntip ruh sha ki bor pynïaid jong ka NEHU,” u la bynrap.
“Ngi la ïohi naduh ki por ba ladep ba une u Registrar u leh da ki kam buitpoh bad mynta ruh u wan rung tuh bad lehse ka jingwan jong u hynne ka sngi u lah ban wan shim wat ïa ki tiar ki bym dei ki jong u ruh,” la ïathuh u President ka NEHUSU.
“Ngi la beh, ngi ieng skhem ha ka rai ban ym ailad,” la bynrap u President ka NEHUSU.
Ka NEHUSU ka la iengskhem ruh ba kan ym ailad daleilei ruh em ïa u Vice Chancellor u Prof. PS Shukla, u Registrar u Omkar Sing bad u Deputy Registrar u Amit Gupta ban pynibor da kaba wan rung sop sop hapoh ka skulbah.
Haba kylli, u la ïathuh ba tang shu kut ka shuti tlang, ha u bnai Rymphang yn sa sdang biang ïa ka jingshim klas bad ong ba ka NEHUSU ruh kan sa shim ïa ka rai ka jong ka ynda ka la bishar shwa ïa ka rai jong ka Enquiry Committee kaba arngut ki dkhot la thung da ka Ministry of Education ka Sorkar India ban tohkit halor ki jingïoh pdiang ïa ki jingujor na ka NEHUSU bad na ki kynhun bapher bapher.
U President ka NEHUSU u la ïathuh ruh ba ka Union ka la plie noh ïa ka jingkhang tala ïa ka Admistration hadien ba u Vice Chancellor Incharge u N. Saha u la pynpaw ka jinglynngoh ban lap ba ka ophis treikam jong ka skulbah kan khang tala.
“Ynda ngi la plie ïa ka tala, ngi la ïakren ruh bad u Vice Chancellor Incharge ha kaba u la pyntip ïa ngi ba um shym la ïoh jingtip eiei ba u Registrar un wan lum ïa ki tiar ki tiar na ka kamra treikam bad na ka Quarter ka jong u,” u la ong.
