Shillong, Naitung, 15: Ka erïong kaba jur kaba la wan beh kyrthep ha ka Lah Sngi u Blei ha ka por kumba 2:30 baje noh sngi ka la kdiah bad pynjulor naphang ïa ki dieng kwai bad ïa ki dieng ki siej kynthup ruh ïa u tympew, ka kait bad kiwei kiwei ki mar rep ba ki nongrep jong ka shnong Umdap Dumu bad ka Umdap Rngi ki ju im kamai jakpoh na ka rep ka riang.
Ki rangbah shnong jong kine ki ar tylli ki shnong ha ka jingïakren bad ki lad pathai khubor ha ka sngi Baar ki la ïathuh nalor ki mar rep, ka erïong ka la jynrat ruh ïa kiba bun ki post electrict hapoh kine ki ar tylli ki shnong kiba hap hapoh ka Umling Community and Rural Development Block, Nongpoh Constituency.
Ki la pyntip ruh ba watla ka eriong ka la pynjulor lut ïa ki mar rep hynrei kam shym la don pat kano kano ka jingjia ba sngewsih.
Na ka liang jong kine ki ar tylli ki dorbar shnong ki la kyrpad ïa ki bor ba dei peit jong ka Umling Community and Rural Development Block ba kin wan jurip bad ban lum jingkheiñ ïa ki jingjulor bad ha kajuh ka por ki la kyrpad ïa u MLA ka Nongpoh Constituency u Bah Mayral Born Syiem bad ïa ka MDC ka Kong Rona Khymdeit ba kin wadlad ban pynïoh jingïarap ïa ki nongrep kiba la mad ïa kane ka jingduhnong kaba shyrkhei na ka jingwan lynshop jong ki bor ka mariang.
