Shillong, ïaïong, 14: Bun tylli ki ïing ki sem ha ka shnong Barato, West Jaiñtia Hills District ki la ngat ïa ka jingshah lynshop ha ki bor ka mariang na ka jingther jong u lapbah lapsan uba wan lang bad u phria ryngkat bad ka eriong erngit kaba jur ha ka Lah Sngi u Blei ha ka por kumba 1.30 baje nohphai sngi.
U MDC Bah Aiborlang Shadap ula ïathuh kane ka jinghap jong u phria ka la pynjulor ïa kiba bun ki longiing longsem haba bun ki tnum iing kiba la sop da ki tin ki la shah lied ha ka eriong bad bun ruh kiba la pei na ka jinghap jong u phria.
Ym tang kata, u la ïathuh ba ka um slap kaba la rung ha ki iing ki sem na ka jingpei jong ki tnum iing kat haduh ba ka la wanrah ïa ka jingshah pynjulor ki mar mata kiba don hapoh ki ing ki sem.
Haba kylli ïa ki jingshah ktah jong ki iing ki sem, ki jingthung jingtep, ki mrad ki mreng, u Waheh Shnong jong ka shnong Barato u Bah Stelin Lamare ula ong ba haduh mynta ym pat lah ban ïoh ïa ka jingkheiñ kaba pura hynrei na ka jinglum jingkheiñ kyrkieh na ki 1000 tylli ki longiing kumba 60% ki longiing kiba la shah ktah bad bun ki jingthung jingtep ki la shah pynjulor nalor ka jingïap jong ki sniang bad ki syiar.
Ula iathuh ruh ba ha kane ka jingther jong u slap bria u phrai uba jur kam shym la don kano kano ka jingjia basngewsih.
