Delhi, Rymphang, 08: Ka Bharatiya Janata Party (BJP) ka la ïoh knieh ïa ka bor synshar na ka kti jong ka Aam Aadmi Party (AAP) ha Delhi ha ka sngi Saitjaiñ hadien ba ka la lah ban pynkhylliem ïa ka AAP kaba bat ïa u lakam synshar ha Delhi naduh u snem 2013.
U nongïalam ka AAP u Arvind Kejriwal ula ïoh 25999 hajar vote u la shah pynliem noh ha u kyrtong ka BJP u Parvesh Sahib Singh uba la ïoh 30088 vote. Katba u Manish Sisodia uba long u nongïalam bahakhmat ka AAP uba u la shah pynliem ha u kyrtong ka BJP u Tarvinder Singh Marwah na Jangpura.
Ka jingjop jong ka BJP ka la pynkut ïa ka samoi synshar jong ka AAP kat haduh ba ka la kyndit haduh katta katta ïa ka ri baroh kawei bad kan dei ruh ka kynti ba ka BJP kan pynïar ïa ki thapniang ha ka saiñpyrthei naduh Delhi kaba long ka nongbah ba kongsan jong ka ri India.
Nalor ka Delhi, ka BJP mynta ka la ïoh bat ïa u lakam synshar ha kiba bun ki jylla ha ka ri India kynthup ruh ha ki jylla kiba don marjan bad ka Delhi kum ka Haryana, Uttar Pradesh, Uttarakhand bad Rajasthan. Ka BJP ka la ïohbat ïa u lakam synshar ha Haryana bad Uttar Pradesh la lai snem kynthih bad ar snem kynthih hadien ba ka la ïoh knieh ïa ka bor synshar na ka from Congress ha Rajasthan ha ka elekshon ha u snem 2023.
Ha ka jylla Haryana la sakhi ba ka jingïakhun ka long kaba jwat bha ha u snem 2023 hapdeng ka BJP bad ka Congress. Hynrei tang shi snem hadien, la sakhi mynta sa ha Delhi ha ka jingïakhun kaba jwat hapdeng lai tylli ki seng saiñpyrthei, kata, ka AAP, Congress bad BJP ki la shah pyndem toiñ namaarba ka BJP ka la jop bun tylli ki Seat, hadien 27 snem.
Ka BJP ka la jop 48 na ki 70 Seats. Ka AAP ka la jop tang 22 Seat, katba ka Congress bad kiwei pat ki seng saiñpyrthei kim shym la lah satia ban jop wat tang shi Seat ruh ha kane ka elekshon.
Shi sngi shwa ka sngi ñiew vote, ka Myntri Rangbah jong ka Delhi ka Atishi bad ki nongkitkam ka AAP ki la kynthah tyngeh ïa ka Sorkar Haryana da kaba kynnoh ba la pynjngut ïa ka wah Yamuna da ka jingthmu ban pynïap ïa ki nongshong shnong ka Delhi.
Sa u Kejriwal ruh u la pynmih ïa kane kajuh ka jingkynthoh ha kaba ka la pynmih ïa ka jingshah kynthah kaba jur ïa ka BJP.
