Shillong, Naiwieng, 24: Ka High Command jong ka party National Poeples Party (NPP) ka la ai ia ka jingmynjur ban pynieng ia ka Dr. Ampareen Lyngdoh kaba long ka MLA jong ka East Shillong Constituency bad ka Myntri jong ka Sorkar jylla ha ka elekshon Lok Sabha na Shillong parliamentary seat ka ban sa long ha u snem ban sa wan.
Ha ka jingiakren bad ki lad pathai khubor ha ka sngi Thohdieng u State President jong ka NPP Meghalaya State Unit Bah prestone Tynsong u la iathuh ruh ba ka party kan pynieng biang da ka Agatha K. Sangma na Tura Parliamentary Seat ha kane ka elekhon.
Shuh shuh u la kam ruh ba ka NPP kan ioh knieh ia ka Shillong Seat na ka Congress namarba lada ianujor ia ka jingioh vote ha ka elekshon MLA kaba dang shu dep long mynta u snem 2023, ka NPP ka long kaba nyngkong eh ban ioh kham bun ki vote, baar ka UDP bad balai ka Congress bad TMC.
Haba kylli, “ngi pdiang sngewbha ia kino kino ki seng saiñpyrthei kiba kloi ban tyrwa ia ka jingiatreilang bad ka NPP ha kane ka elekshon.”
Kat haduh mynta, dei tang ka Voice of the People Party kaba ladep pynbna ia u Dr. Ricky J Syngkon kum u kyrtong ban iakhun ia ka elekshon na Shillong Seat. Katba ka UDP kaba iatreilang bad ka HSPDP hapoh ka lama jong ka Regional Democratic Alliance (RDA) ki dang wad ia u kyrtong monlang ban pyniakhun ia kane ka elekshon na Shillong Seat.
