Shillong, Lber, 29: Ka Ophis jong ka Deputy Commissioner ka East Khasi Hills District ha ka sngi Saitjaiñ ka la lum da ka jingialang ia ki nongmihkhmat jong ki shnong bapher bapher kiba don ha khappud ka East Khasi Hills, Ribhoi bad West Jaiñtia Hills District ban iathir sani bad ban ai jingpynshai halor ka jingthmu jong ka tnat Pynroi Sor ka Sorkar Jylla ban shna ia ka thehñiut ne ka Integrated Solid Waste Management Facility ha u Lum Sohlait uba don ha ka shnong Nonghali.
Dang shen ki paidbah nongshong shnong ki la mih ban pyrshah ïa ka Public Hearing ha kaba ïadei bad ka jingthmu ban shna ïa ka jaka theh niut jong ka Shillong Municipal Board (SMB) ha u lum Sohlait ha ka shnong Nonghali.
Ka Deputy Commissioner jong ka East Khasi Hills ka Kong RM Kurbah haba kren sha ki lad pathai khubor hadien ba la wai ka jingialang ka la ong, “ha ka jingshisha ka la don jingthmu ban pynlong ia ka public hearing ha ka 2 tarik, Iaiong, 2025 da ka Meghalaya State Pollution Control Board hynrei namarba ka la don ka jingpyrshah ngi la hap ban khot shwa da ka jingialang bad ki shnong bad ynda ngi la sngap ia ka sur jong ki nongialam shnong ka long kaba shong nia namarba ba ki shnong ki ban shah ktah na kane ka projek ki kham bun.”
“Ngi la pynshai bad ngi la pynsngewthuh ia ki bad la rai mynta ban leit sha ki shnong ban ai jingpynshai bad hadien shi bnai ngin sa iakynduh biang bad ia ka public hearing kan sa long ynda ki paidbah ki la sngewthuh ia ka jingmyntoi jong kane ka projek,” ka la ong.
Ka la pyntip ba ki nongialam shnong kiba la ioh jingpynshai na kane ka jingialang kin sa leit ban pynsngewthuh sha ki nongshong shnong ha ki shnong jong ki.
Haba kylli, ka Kong Kurbah ka la ong, “kumba ju long ka rukom haba wan kino kino ki projek jong ka sorkar ki ju iasoi ia ka Memorandum of Understanding (MoU) bad ka tnat Urban Affairs kan sa soi ia ka soskular bad ki nongshong shnong ba kin long ki nongpeit pyrman khnang ba lada don ka jingdkoh ha ka jingpyntreikam ia ka projek yn sa ioh ban iatai biang.”
U President jong ka Synjuk Nongsynshar Shnong Bah Super Rngaid haba pynpaw halor ka jingiakren ha ka jingialang u ong ba kum ka Synjuk ka dang don hapdeng ka jingartatien namarba manla ki projek ba la wanrah da ka sorkar kim ju urlong katkum ba la pynpaw ha ka kot sada.
“Ngi la iohi ia ka jingpynbna kaba ong da kumwei katba ynda la pyntreika ia ki skhim ne ki projek kim iahap dur satia. Ngi la batai ba ngim lah ban shaniah ia ka Sorkar bad dei ia kata ka jingartatien ba ki la ai jingpynshai ia ngi,” u la ong.
“Ngi la shim ruh ia ka rai ba ka dei ban don shwa ka jingiathir iatai bad ka ophis jong ka DC kan sa shna da ka Whatsapp Group ban iakren halor kane mat. Ngi la dawa ruh ba ka dei ban don ka jingiamynjur shwa ban pyntreikam ia ka projek namarba khlem ka jingiasoi ia ka soskular ngin ym ailad satia ia ka projek ban pyntyllun shakhmat,” la ong shuh shuh u Bah Rngaid.
Katkum ka jingiathuh jong u, ka jingpyrshah jong ka Synjuk ka long halor ka nongrim ba ka jaka ba la tyrwa ban shna ia ka jaka thehniut ka don shajrong jong ka Wah Umkhen kaba ju bsa um palat 15 tylli ki shnong.
“Ngim kwah ban iohi ba kane ka projek kan pynjaboh ia ka wah Umkhen,” la ong u President ka Synjuk bad bynrap, “ka jingleh jong ka Sorkar ka long ka bym lah ban pdiang haba buh ia ka jaka thehniut namarba ym shym ka pyntreikam katkum ka ain bad kan buh jingeh ia ngi hi ki paidbah kiba shong basah hajan ka jaka thehñiut.”
U la iathuh ruh ba ka synjuk ka la dawa ba shwa ban sdang ia ka projek ka Sorkar ka dei ban iasyllok, ban pynshai ban iathir bad ban iatai sani bha.
