Shillong, Jymmang, 21: U Myntri Rangbah ka Jylla Conrad K. Sangma ha ka sngi Balang u la aiti ïa ka First Instalment kaba T. 1 klur hapoh ka Meghalaya Healthcare Advancement Policy (MHAP) sha ki bor pynïaid jong ka Dr. Norman Tunnel Hospital, Jowai.
Ka jingïarap pisa ban ai sha kane ka hospital kan kot T.2 klur. Ka pisa ba dang sah sa T.1 klur yn sa pyllait ynda la aiti ïa ka Utilization Certificate na ka bynta first instalment.
Hapoh kane ka skhim, T. 10 klur la ai jingïarap sha ki san tylli ki hospital ki bym don jingïarap nangno nangno ruh.
U Myntri Rangbah haba kren ha kane ka sngi u la pynpaw ba ka sorkar ka don ïa ka jingïateh kaba la slem bha bad ki hospital ba la pynïaid da ki mishon.
“Kane kam dei ka jingai jingïarap kaba tang shi syn ai hynrei ka dei ka jingsdang ban don ka jingïatreilang kaba ïaineh. Kane ka skhim ka dei kaba jlan, ki shlem sumar ki lah ban shim rai kaei kaba ki donkam kyrkieh bad ban pyntreikam ïa ka pisa,” u la ong.
U Rev. S. Lamare, u la pynpaw ka jingsngewnguh na ka bynta ka jingai jingkyrshan bad pan jingkyrshan shuh shuh ban ïarap na ka bynta ban shna ïa ki jingtrei bad ïa ka jingule Nursing.
U Medical Superintendent Dr. D. Nongpluh, u la pynpaw ïa ka jingdonkam kyrkieh ïa ka Dialysis Unit.
U Mynti Rangbah u la pynbna ruh ba yn sa pynlong ïa ka jingïalang ïamir jingmut halor ka koit ka khiah khnang ban pynkhlaiñ ïa ka jingïadei hapdeng ka Sorkar, ki shlem sumar ba la pynïaid da ki mishon bad ki kynhun bapher bapher.
U la pyntip ruh ba ka jingïarap kaba bteng ha ka tnat ka koit ka khiah, kynthup ïa ka jingpyntreikam ba kyrpang ban weng ïa ka jingïap shiteng por jong ki longkmie da kaba pynduna ïa ka MMR palat 45%, kaba la pynhiar sha ka jingkheiñ kyllum ha ka ri baroh kawei.
“…kane ka jingjop ka dei kaba la pynshong nongrim shibun eh ha ki jingthmu kum ka skhim CM Safe Motherhood, kaba pynthikna ïa ka jingpeit bniah ha ka por ba biang ïa manla ki longkmie baarmet ha ka jylla”, u la bynrap.
U la pyntip ba ka Sorkar ka la pyndonkam da ki technology ban khmih bniah bad ban buddien ïa ki jingkha khun kiba don jingma, kynthup ïa ka jingpynbeit ïa ki jingeh ha ka por kaba biang.
