Shillong, Nailur, 19: Ka Khasi Students Union (KSU) South West Khasi Hills District ha ka sngi Thohdieng ka la sei madan ïa ki jingshisha halor ka jingthmu ai jaka jong u Syiem ka Hima Maharam sha ka tnat shipai BSF ban shna ïa ka Unit Headquarter ha ka shnong Soh Boitram (Photmula).
U President ka seng u samla Forwardman Nongrem ha ka jingïakren bad ki lad pathai khubor u la kynnoh ba katkum ki jubab RTI la lap ba u Syiem u ladep phah lypa ïa ka shithi sha ki bor synshar district ha ka 6 tarik Jylliew 2025 ban ong ba u Syiem lem bad ka Durbar Hima ki la pdiang ïa kane ka jingtyrwa jong ki shipai wat lada ïa ka Executive Durbar jong Hima yn dang lum hadien ar taiew hadien ba u ladep ai ïa ka shithi kata ha ka 28 tarik Jylliew, 2025.
U samla Forwardman u la kynthoh ruh da kaba ong ba kane ka jingleh jong u Syiem ka pyni ba u khein dewthala ïa ka Executive Durbar jong ka Hima bad u niew ba baroh ki Myntri Shnong bad ki Lyngdoh kum ki niangkohnguh ba un pynïaid katba mon ïa ki.
Haba pynpaw ba ka seng, ki khun hajar ka Hima bad kiwei kiwei ki sengbhalang ki pyrshah jur u la ong, “ngi tip shai ba ka Unit Headquarter ka dei ka jaka ba ki shipai ki mut pynlong shnong na bynta jong ki lem bad ki khun ki kti jong ki kumba long ha kiwei kiwei ki jaka kum ha Upper Shillong, Happy Valley bad kiwei kiwei. “
Katkum ka jubab RTI, u la ïathuh ba ki shipai ki la leit ban jurip tang ïa ka Photmula hynrei kim kwah pat ban leit sha ki jaka ba hap ha khapud ba ïajan bad ka jingker sainar. Kane ka pyni ba ka don kaei kaei sha lyndet halor kane bynta da kaba kdew ruh ba lada ki shipai kin ïoh tei ïa ka Unit Headquarter kan ktah ha kiba bun rukom kan pynlong ruh ïa ki paid khasi ban nang ritpaid shuh shuh nalor ba la ritpaid lypa.
Ha kaba ïadei bad ka thungkam thungjam, u samla Forwardman u la ong, “ka dei ka bym shongnia namar na kaei kaba ngi ïohi ka long ha ki jaka shipai ym shym la ïohi ruh ba ki Khasi ne trai shnong kin ïoh wat ïa ka kam ban sar phyllaw.”
Ka seng ka la pynshai ruh ba ïai pyrshah halor kane ka mat kat haduh ba u Syiem ryngkat ka Dorbar Hima kin ai da ka jingthoh bad pynshai paidbah ba ki la weng noh ïa kane ka jingthmu.
