Shillong, K’lyngkot, 13: Phra ngut ki heprit ki la shah jied ha ka Directorate of School Education and Literacy (DSEL) ka Sorkar Jylla ban leit pule ha Aga Khan Academy, ka shlem pule kaba don ha nongbah Hyderabad, Telangana.
Ha ka jingïakren bad ki lad pathai khubor ha ka Lah Sngi u Blei u Director jong ka Samagra Shiksa u Swapnil Tembe uba long ruh u Director jong ka School Education and Literacy ka Sorkar Jylla ha ryngkat ka jingdonlang jong u Dean ka Aga Khan Academy u la ïathuh ba ïa ki saw ngut ki heprit pule la jied lyngba ka jingpynlong ïa ka test bad ka interview kaba thikna ha ka Phase-11, 2025 bad saw ngut ladep jied ha ka Phase-I, 2024.
Ka jingjied ïa kine ki phra ngut ki khynnah kiba wan na ka longiing kaba kham duna ka ïoh ka kot ka long hadien ba ka Aga Khan Academy ka la pynlong ïa ka Talent Identification Program (TIP) da ka jingïatreilang bad ka tnat Pule Puthi jong ka Sorkar Jylla.
Ka Aga Khan Academy ka buh thong ban ithuh bad saiñdur ïa ka lawei jong ki khynnah skul kiba wan na ki longing kiba kham duna ka ïoh ka kot ha ka imlang sahlang da kaba plie lad ïa ki ban pule ha kane ka Academy khnang ba kin dup lah ban bteng ïa ki kyrdan pule ym tang hapoh ka ri hynrei wat shabar jong ka ri.
Naduh ba la sdang, kane ka jingthmu jong ka TID ka la pyndep ar tylli ki bynta, ha kaba ïa ka bynta ba nyngkong la sdang ha u snem 2022 ha kaba la jied saw ngut ki khynnah skul na kane ka jylla Meghalaya bad kiba la ïoh jingmyntoi na ka Scholarship.
La jied pat sa saw ngut ki khynnah skul ha ka Phase-2 ban rung sha ka Academy ha u snem 2025.
