Shillong, Nailar, 05: Ka Sorkar Jylla lyngba ka National Highways and Infrastructure Development Corporation Limited (NHIDCL) ka la pynkhreh ban thied jaka na ka bynta ban ïoh shna ïa ka surok 4-lane Greenfield Alignment (High-Speed Corridor) ka ban ïaid lyngba na ki 34 tylli ki shnong kiba don hapoh ka East Jaiñtia Hills district.
Kine ki shnong ki kynthup ïa ka: Tuber Shohshrieh, Tuber Kmai Shnong, Wapung Shnong, Wapung Skur, Lad Rymbai Datsimpein, Mookhep, Lad Rymbai B, Dkhiah West, Dkhiah East, Khlieriat East, Rymbai, Umsatai, Pynurkba, Bataw, Lakadong Umlatdoh, Lakadong Ummat, Lama, Borghat, Natbor, Dein Satlang, Kwator, Demlakang, Ladwahwapung, Hingaria, Huroi, Lahalein, Lejri, Borsora, Kuliang, Umkiang, Lum Phyllut, Dona Skur, Dona Umbluh bad Ratacherra.
Haba pyntip ïa kane ha ka sngi Baar, u District Collector jong ka East Jaiñtia Hills District u la ong, “la pyntip sha ki paidbah ba kino kino ki jingshna thymmai ne ki kam pynroi hapoh ki jaka ba la buh kyrpang jong ka jingthmu ban shna ïa ka 4-lane Greenfield Alignment (High Speed Corridor) ki dei ban ïoh jingbit shwa na ka ophis jong ka Deputy Commissioner.”
“Shuh shuh, la pynpaw shai hangne ba kino kino ki jingtei bym ïoh jingbit – la ki long kiba shipor ne kiba neh shirta- kiba la tei hapoh ka Right of Way (ROW) ba la tyrwa hadien ba la pynmih ïa kane ka jingpynbna yn nym kheiñ ba ki long kiba bit ban ïoh ïa ka jingsiew bailutksan ha ka por ba shim jaka ne ba pyntreikam ïa ka projek. Kane kan treikam tang na ka bynta ki jingtei shimet bad ki dukan,” u la ong.
U District Collector u la pyntip ba ka hukum kan treikam noh mardor naduh ka sngi ba la pynmih ïa kane ka jingpynbna.
