Shillong, Naitung 29: Uwei u rangbah ba la tip kyrteng kum u Bah Dlas Shadap, 41 snem u kurim jong ka Kong Iunika Bamon uba shong basah ha ka shnong Umshangktad, Ri-Bhoi District u la shah tangon ha ki runar ki bym lah ban ithuh ha phyllaw iing lajong haduh ba um tip briew shuh ryngkat ka jinglyngkien jong ka snam ha madan haduh ba u la mynsaw jur ha ki bynta jong ka khlieh bad ka shadem.
Katkum ka jingtip ba la ïohlum, la ïathuh ba kane ka la jia ha ka 26 tarik mynta u bnai. Ïa u Bah Dlas Shadap la lap da ka kurim jong u ha ka por 4:00 baje mynstep kaba dap ruh da ka jingsngew lyngngoh ba kam shym la ïohsngew eiei halor ka jingshah tangon jong u kurim ha phyllaw iing.
Ka Kong Iunika ka la ïathuh ba u kurim jong ka u la buaid kiad ha kane ka miet bad la wan buh ïa u sha iing da ki briew bad ha kane ka por ka don bad u hynmen jong ka bad u la phah khatja ban ïa bamja lang hynrei hadien ba u ladep bamja u kynroi ïa ka hynrei ka la leit ban thiah noh namarba ka samthiah palat.
Ka la ïathuh ruh hadien ba ka la ïohthiah kam shym la tip shuh ïa kaei kaba la jia ïa u kurim jong ka hynrei dei tad haduh ka por 4:00 baje mynstep ynda ka la khie namar ka jingshitom u khun ka la lap pynban ba u kurim jong ka u la thiah lyngktar ha phyllaw iing ryngkat ka jingphlei snam bad marmar ka la pyntip ïa kane ka jingjia sha ki bahaiing,.
Ka la ïathuh ruh ba ha ki por ba mynshuwa ka la ju don ka jingïashoh bad ka kmie jong ka namarba kum ka iing ka sem kim suk satia ïa ka jingïapoikha jong ki.
U Bah Plas Shadap uba dei u trai jong u rangbah ba shah shoh u la ïathuh ba u u la ïoh jingtip halor ka jingshah tangon jong u hymmen ha ka sngi Saitjaiñ lyngba u kthaw kurim jong u hynmen jong u.
Kum u para, u la pyntip ïa kane ka jingjia sha ki Pulit ka Mawlasnai Police Outpost bad la pynkit noh ïa u Bah Dlas sha Bhoirymbong CHC hynrei namar ka jingmynsaw ka la jur shaba palat la pynkit noh sha NEIGRIHMS namar ki bynta jong ka khlieh ki la pait bad kumjuh ruh ki bynta jong ka shadem.
Kum ka iing ka sem ki dawa ïa ki bor Pulit ba ki dei ban shimkhia ïa kane ka kam khnang ban nym ailad ïa kum kitei ki runar bad ki kam sniew ba kin kha roi khamtam ban thmu ban shim wat ka jingim briew.
U Rangbah Shnong jong ka shnong ka Umshangktad u Bah Batskhem Sohtun u la pynrem jur ïa kane ka jingjia bad u la kyntu ïa ki bor jong ka aiñ ban thwet tyngeh ïa kiba donkti halor kane ka kam runar.
