Shillong, Rymphang, 28: Ka Students Wing jong ka Hynñiewtrep Integrated Territorial Organization (HITO) ha ka sngi Palei ka la maham ban leh da kaba tyngeh pyrshah ïa kino kino ki kynhun kiba pyrshang ban wanrah ïa ka jingsngew ïapher jaidbynriew hapoh ka Bri u Hynñiewtrep bad ïa kino kino ki kynhun shitniam kiba pyndik ïa ki skul ba la pynïaid da ki Balang Khristan hapoh u pud u sam jong ka Jylla Meghalaya.
Ki nongïalam jong kane ka kynhun ki la tah da ka notis jingmaham ha ka kynroh jong ka ophis treikam ka Assam Sanatan Dharma Sabha (ASDS) ban pyrshah bad ban maham halor ka jingkynnoh ba kane ka kynhun ka la dawa ïa ki bor pynïaid skul ban weng lut ïa ki dur niam bad ïa u stashu Jisu na ka Sacred Heart Secondary School, Marmaiñ, Ribhoi District.
“Ngi la wan ban tah da ki notis jingmaham ha ki kynroh bad ki biar jong kane ka ophis ka Assam Sanatan Dharma Sabha ban pyrshah bad ban maham tyngeh ruh ïa ki halor ka jingleh jong ki ha ka thaiñ Marmaiñ kaba don ha khappud jong ka Ribhoi Distirct, Meghalaya bad ka Assam. Ka jingleh jong ki, ka long da kaba tah notis ha ki skul ba la pynïaid da ki mishoneri da kaba maham lada kim weng ïa ki dur jong ki riewkhuid bad ïa u stashu Jisu kaba long kum ka jingibeiñ ïa ki nongpynïaid skul jong ki Phadar,” ong u Vice Chairman jong ka Student’s Wing ka HITO u Samla Kitshemphang Warjri ha u kyrwoh ba la phah sha u nongthoh khubor.
“Ngi ruh ngi lah ban tah ïa ki notis bad ngi lah ban maham tyngeh ïa ki namarba ka jingleh jong ka pynduh ïa ka jingmane Blei laitluid ha kane ka jylla Meghalaya. Ngim sngewtynnat bad kaei kaba phi leh ngim sngewtynnat,” la phah kyrwoh une u nongïalam ka HITO sha ka Assam Sanatan Dharma Sabha (ASDS).
“Ngi maham ïa kino kino ki seng shitniam Hindutva lada ki leh ïa kine ki jait kam ban tah ïa ki notis ngin leit ban ïakynduh markhmat bad ngin ym shah daleilei ruh bad ngin ai da kaba tyngeh bad ngin rah ïa ki bor ba dei peit. Kane ka jingleh jong kine ki seng (Assam Sanatan Dharma Sabha) ka buh jingkylli ïa ngi balei phi donkam ban phin leh ïa kumne ki kam. Lada phi kwah ban leh kumta balei kim leit ïakynduh ïa ki bor ba dei peit,” kynthoh u samla Warjri.
“Me donkam aiu ma me ban wan leh kumne ha kane ka khyndew jong ka Bri u Hynñiewtrep. Ngim pat ju pynthud ïa kano kano ka jaitniam ha kane ka Jylla. Lada kiwei ki leh kumne balei ngin shu sngap,” ong shuh shuh u Vice Chairman ka Students’ Wing ka HITO.
“Lada ka RSS ka lah ban dei ka Hindu Extremist Group bad kiwei kiwei ki lah ban dei ki Hindu Extremist Group, ngi, ngi lah ban dei ka Christian Extremist Group. Ngim salia ïa kata, ngi ïakhih ïa kaba dei, ngim sngew eiei, ngin tur shaphrang,” la maham u Samla Warjri.
