Shillong, Nohprah, 08: Ka Jaiñtia Students Union (JSU) ka la pyrshah ïa ka jingthmu jong ka North East Frontier Railways ( NFR) ban leh sorjamin na ka bynta ka jingtyrwa ban pynpoi ïa ki ar tylli ki lynti Rel ha nongbah Jowai, West Jaiñtia Hills District.
Ha u kyrwoh ba la phah sha ki lad pathai khubor ki ar tylli ki lynti rel ba la tyrwa ki long ka Jowai-Khliehriat Chandranathpur Line kaba jrong 79 kilomitar bad kawei pat ka dei ka Chaparmukh-Jowai Line kaba jrong 180 kilomitar.
Katkum ka JSU, kane ka jingtyrwa jong ka Sorkar India ka la paw lyngba ka jingmynjur ha ka Budget 2024-2025 ban sorjamin ïa ka jingtyrwa ban pynpoi ïa ka lynti Rel, kawei ka dei kaba la tip kum ka Jowai Khliehriat Chandranathpur Line 79 kilomitar bad kaba ar ka dei ka Chaparmukh Jowai Line 180 kilomitar.
“Ka JSU ka la maham jur ïa ka Sorkar ba kam dei bam leh da ka bor,” la maham ka seng.
“Ka daw ba ka JSU ka la pyrshah ïa ka lynti Rel (ka long) ba haduh mynta ngim pat don ïa ki aiñ ba tikna ban pyrkhing ïa ki bar jylla lada ka rel ka ïoh ban wan shapoh rilum Jaiñtia bad ka jingma ka la ap lypa ïa kine ki lum kiba itynnad jong ngi,” la ong ka JSU.
“Ngi la ïohi ïa kaei kaba la jia hapoh Them mator bad lum Survey. Ngi ïohi ruh ba ka jingdon ka Rel hapoh nongbah Delhi, Assam kam wanrah jingmyntoi ïa ka Meghalaya namarba ka dor jong ki mar ki mata tiar ki long hi kumjuh,” la pynpaw ka JSU.
Ka JSU ka la maham ka ka Sorkar ba kam dei bam leh da ka bor ïa ka jingpyrshah jong ki paitbah bad ka JSU ka la maham ïa ka Jaiñtia Hills Autonomous District Council (JHADC) ba kam dei ban pyndonkam bakla ïa ka bor ha kaba ïadei bad kane ka ishu.
“Ka JSU ka la kyrpad ïa ki Waheh Shnong, ki Sengbhalang ban ïatreilang bad ban pyrkhat bunsien hashwa ba kin ai jingkyrshan ïa kane ka mat,” la pynpaw shuh shuh ka seng.
