Shillong, Nailar, 03: Ka United Hynñiewtrep Movement (UHM) Central Executive Council ka la maham tyngeh ia ka tnat Forest jong ka Sorkar Jylla ba kam dei ban shu leh donbor ia ki trai jylla kiba die jingdie harud surok ha ka thain 7 Mer, Upper Shillong.
Ha u kyrwoh ba la soi da u President u Bah Charlie J. Rani bad u Secretary u Bah Teibor Shadap, ka seng ka la pynpaw ia ka jingbitar hadien ba ka la ioh ia ka jingujor na ki nongshong dukan kiba shong die jingdie ha ka jaka ba dang hap hapoh ka tnat Forest ha 7Mer Upper Shillong.
“Ka seng kaba la iakynduh ia ki nongshong dukan ka la sngap thuh ia ka jingshem lanot bad ka jingshah ñiew beiñ jong kine ki nongshong dukan kiba im da kaba kamai mynstep bad bam da miet, ba ha ka por ba wan lynshop ka jingpang khlam Covid-19 ia kane ka jaka la ai sngewbha da ka tnat Forest ban pynlong iew ban die ia ki mar rep bad kumjuh ruh kiwei kiwei ki kam kiba iadei bad ki marbam mardih. Hadien ba kine ki paradoh parasnam ki la ioh jaka hangne kim banse ban pyllait noh ia ki dukan ba ki shong baroh shikatta namarba ka shem jingeh ban pynmih bai wai khlem da ioh plie ia ki dukan ki jong ki ha ka por ba la wan lynshop ka jingpang khlam Covid 19, hynrei da ka mynsiem ba kmen ki lah ioh jingkyrmen lyngba ka jingiohlad ban shong ha kane ka iew ba dei ka jaka jong ka tnat Forest, hynrei kaba pynsngewsih ia ki pat ka long ba shu syndet syndet khlem kano kano ka jingthoh na ka liang ka tnat Forest ki shu byrngem beit ban rat naphang ia ki dukan kiba ker dara hangto. Ka jingkylli kaba ka seng ka buh ia ka tnat Forest ba ka jingmut aiu ban buh ia kato ka jaka hangto kaba shu long thylli ha ka jingshisha ka dei ban ailad khamtam haba ki paradoh parasnam jong ngi ki ioh ban kamai jakpoh nangto khamtam ha kum kane ka por ba ka jingkyrduh kam kyrduh jam jong ki paidbah ka lah jur shaba palat, bad daleilei ka seng kan ym ailad ia kum kine ki jingleh donbor jong ka Sorkar ia la ki jong ki paradoh parasnam jong ka Bri u Hynñiewtrep Hynñiewskum jong ngi,” ong u kyrwoh.
“Lyngba une u kyrwoh ka seng ka maham tyngeh ia ka tnat Forest ba kam dei ban leh donbor kumne ia kine ki nongshong dukan hangne bad lada ka don ka jingthmu ban shna ne leh eiei ia kane ka jaka katkum ka jingdonkam jong ka tnat kan hap ban pynioh jaka ia kine ki nongshong dukan hangne kata ruh kaba long ka jaka kaba paka lym kumta ka seng kan sa shim da ki sienjam ba tyngeh,” la dawa ka UHM.
Ka seng ka buh ruh ka jingkylli ia ka tnat Forest ba ka dei ban kyndang noh mardor ia ka jaka mane blei jong kiwei pat ki niam ba la tei be-aiñ ha Mahadev Khola bad kumjuh ruh kiwei kiwei ki jaka ba lah tei be-aiñ ha ki jaka jong kane ka tnat.
U kyrwoh u la pyntip ba ka seng kan sa wad jingtip da ka RTI ia kiba bun ki jaka jong ka tnat Forest bad lada lap ba don ki jingpyndonkam bakla ia ki jaka jong ka da kino kino ki riewshimet ka seng kam banse ban shim da ki sienjam ba tyngeh kata da ki jingiakhih bad wat kat haduh ban da poi shaduh sha High Court.
