Shillong, Jylliew 14: U Myntri ka Sorkar Jylla uba khmih ïa ka tnat Jngohkai Pyrthei u Bah Paul Lyngdoh ha ka sngi Balang u la maham tyngeh ïa ki nongjngohkai pyrthei kiba wan kai sha ka jylla Meghalaya ba kim dei ban wan da kawei pat ka jingthmu namarba ka don ka tnat Pulit ka ban pynshitom katkum ki kyndon jong ka aiñ.
U Bah Paul u la pynmih ïa kane ka jingmaham haba kren ha ka jingïalang pynkup burom ïa ki kynhun bapher bapher kynthup na ka tnat Pulit kiba la trei shitom ban wad haban da shem ïa ka met jong u Raja Raghuvanshi uba la shah pynïap ha la ka jong ka kurim ka Sonam Raghuvanshi ha ka jingleit kai ‘honeymoon sha ka shnong Sohra ha ki taiew bakhatduh jong u bnai Jymmang 2025.
Ki briew kiba nabar ka jylla ki la kynthoh bad pynbudnam sniew laiphew jait ïa ka shnong Sohra bad khamtam ïa ki paidbah nongshong shnong ka jylla Meghalaya baroh kawei hadien ka jingshah pynïap jong u nongjngohkai pyrthei na Indore u Raja Raghuvanshi ha Parking Lot, Wei Sawdong, Sohra.
“Ngi donkam tang kawei na ka liang jong ki nongjngohkai pyrthei haba ki wan shane sha ka jylla jong ngi, sngewbha wan da ki kti kiba khuid, da ka dohnud kaba khuid bad ka jingmut jingpyrkhat kaba khuid. Wan shane ban lehkmen ïa ka jingitynnat ka jingithiang, ïa ka jingkhring jong ka mariang jong ki jaka jngohkai pyrthei jong ngi,” la ong u Bah Paul.
“Wat wan shane da kawei pat ka jingthmu, namar lada phi don da kawei pat ka jingthmu ka don ka tnat Pulit jong ka Meghalaya ka ban pynthikna ba kin set bad kin pynshitom ïa phi katkum ka aiñ jong kane ka ri,” la maham u Bah Paul.
“Kijuh ki briew kiba wan ar taïew mynshwa kum ki nongjngohkai pyrthei mynta ki don ha Shillong kum ki koidi Under Trial Prisoner (UTP), pyrkhat hi ma phi kaba mut ngi pdiang sngewbha ïa ki ar liang ki kti, hynrei lada phi tam ïa u laiñ jong ka aiñ, ma ngi hi ngin thep ïa phi ha ka along bad ngin tian bishar ïa phi ha ka kashari kaba don ha ka jylla jong ngi. Kata ka dei ka Meghalaya,” la maham shuh shuh u Bah Paul ïa ki nongjngohkai pyrthei.
Halor ka jingtyrwa jong ka Sohra Region Tourism Assocation (STRA) u Myntri u la ong ba ki dang don bun kiei kiei kiba dang dei ban leh.
“Hynrei ka ju long hi ka rukom haba u briew ba smat ba sting haba u pynbeit ïa ka kamra katta u nang lap ha kyndong kynshrot ki ñiut ki ñier kiba dang dei ban khat,” u la ong.
“Ngi hap ban pynthikna ïa ka jingïaid ryngkat ryngkat ka jingshngaiñ, ka jingïada bad ka jinglong shimet jong ki nongjngohkai pyrthei,” u la ong.
