Shillong, Nailar, 07: U Superintendent of Police jong ka East Khasi Hills District u Bah S. Nongtnger ha ka sngi Balang u la pyntip ba ka tnat Pulit ka la ïoh bat haduh 408 tylli ki kali naduh ka 14 tarik, Naitung haduh ka 1 tarik Nailar, 2024 kiba tah da ki plastic rong ïong ha ki iit jong ki jingkhang kali bad ïa kine ki nongpynkheiñ aiñ la pynshitom katkum ki kyndon jong ka Motor Vehicle Act.
Lyngba u kyrwoh ba la phah sha ki lad pathai khubor u Superintendent of Police u la kyntu ruh ïa ki trai kali ba kim dei satia ban tah ïa ki platic rong ïong ïa ki iit jong ki jingkhang kali namarba ka pynkheiñ ïa ka hukum kaba la bthah da ka Iingbishar Supreme Court jong ka ri India.
U Superintendent of Police u la maham ruh ba kino kino kiba ïaleh pyrshah kin shah pynshitom katkum ki kyndon jong ka aiñ.
