Shillong, Rymphang, 13: Ka District Magistrate jong ka East Khasi Hills District Kong RM Kurbah ha ka sngi Palei ka la pynjari da ka hukum hapoh ka Section 163 BNSS kaba mana ban pynlong ïa ka jingïatur masi kyrtoh hapoh u pud u sam jong ka East Khasi Hills District.
Ha kane ka hukum, ka District Magistrate ka la ong, ‘la pyntip ba ka don ka jingpynlong ïa ka jingïatur masi kyrtong khamtam haba pynlong ïa ki Fete/kiwei kiwei ki tamasa ha ki katto katne ki shnong hapoh ka East Khasi Hills Di strict;
“Lada ailad ïa kane ka jingpynïatur masi kyrtong, ka pynkheiñ ïa ka Section 11 jong ka Prevention of Cruelty to Animals Act, 1960 bad ruh, ka pynkheiñ ïa ka hukum jong ka Ingbishar Supreme Court ba la pynmih ha u snem 2014,” ong ka hukum.
“Katkum ka iktiar ba la pynkupbor hapoh ka Section 163 BNSS….la mana ban pynlong ïa ki jingïatur masi kyrtong hapoh ka East Khasi Hills baroh kawei. Kino kino kiba pynkheiñ kin ngat ha ki jingpynshitom hapoh ka aiñ,” la bynrap ka hukum.
Kane ka hukum kan treikam noh mardor tad haduh ban da pynbna da kumwei pat, la ong shuh shuh ka hukum na ka District Magistrate ka East Khasi Hills District.
