Shillong, Naitung, 02: Ka Khasi Students’ Union (KSU) ka la maham tyngeh ïa kino kino ki riewshimet bad kino kino ki kynhun kiba pyndonkam bakla ïa ka kyrteng, ka shab bad ïa ka kyrteng jong ki nongïalam barim jong ka KSU.
“Ngi la ïoh jingtip ba don ki riewshimet bad ki kynhun kiba la leh bad thmu pyndonkam bakla ïa ka kyrteng ka seng, ka shab ka seng bad ka kyrteng ka nam ki nongïalam barim ka seng na ka bynta ka myntoi shimet jong ki. Ka seng ka maham tyngeh ïa kum kine ki briew bad ki kynhun ba lada ki leh tamti tamjat ban pyndonkam bakla na ka bynta ka nam ka burom malade kan ym artatien wat ban pyni da ka bor met ruh pyrshah ïa ki,” ong u kyrwoh ba la phah da u General Secretary ka KSU u samla Donald V. Thabah.
Ka KSU ka kyntu ïa ki khun ka Bri u Hynñiewtrep ban ym shah ïalam bakla bad shah pynthame ha kino kino ki briew lane kynhun bad wat ki sengbhalang kiba leh mynleh ieid jaidbynriew tang na shynrong hynrei napoh napoh pat ki dei tang ki dalal jong ki bor Sorkar, ïarmangkalai bad mynder ri.
“Kine ki kynhun ki dei kita ki suri kup snieh langbrot kiba leh ieid jaidbynriew tang ban ïoh nam bad ban pynjah kyrteng ïa ka KSU kaba la ieng skhem triang la 46 snem mynta ban long ka kynroh kaba skhem jong ka jaidbynriew Khasi. Ki paidbah ki lah ban sakhi ruh ba lada don kino kino ki mat kiba ka KSU ka ju shim na ka bynta ka bha ka miat u paid Khasi, kine ki kynhun ki ju mih kynsan kynsan ha kum kita ki por ban shim pat ïa kiwei ki mat tang ban pyntlot noh ïa ki mat kiba la shim ka KSU (overshadow). Ki paidbah ki lah ban bishar ba lada leh eiei ka KSU wat tang ki mat kiba rit ruh, ki dkhot kin shah kem beit khlem daw kumba la paw ba haduh mynta san ngut ki dkhot ka seng ki dang shong sajia ha byndi kiba kynthup ruh wat ïa ar ngut ki nongïalam na ka CEC. Hynrei ki dkhot jong kum kitei ki seng kim ju shah kem ha ki bor Pulit kaba pyni ba lehse ïoh don kaei kaei (nexus) sha lyndet,” la kynthoh ka KSU.
“Kyntang ïa wai ka KSU ka maham biang ba ym bit ban leh kino kino ki kam kiba ïa dei bad ka seng KSU kaba mynta bad mynshwa lane bad ki nongïalam ba mynta bad mynshwa khlem da ïoh jingbit na ka CEC jong ka KSU,” la ong u kyrwoh.
