Shillong, Rymphang 04: Ka Deputy Commissioner jong ka East Khasi Hills Kong RM Kurbah ha ka 27 tarik, Kyllalyngkot, 2025 ka la pynmih da ka hukum kaba khang pyrshah ban pynlong ïa ki jingiakhih shah thngan, jingïalang paidbah, ki proseshon, rally bad kiwei kiwei da ki katto katne ki seng hapoh ka district.
Kane ka hukum ka la mih ruh halor ka jingpynlong ïa ka elekshon sha ka Khasi Hills Autonomous District Council (KHADC) ban sa long ha ka 21 tarik mynta u bnai.
Katkum ka hukum hapoh ka Section 163 BNSS ka Kong R. M Kurbah ka la ong ba kum kine ki jingïalang, jingïakhih ki lah ban wanrah ïa ka jingbym shongsuk shongsaiñ hapoh ka district bad ka lah ruh ban ktah ïa ka jingpynlong ïa ka elekshon sha KHADC.
Kane ka hukum kan treikam mardor tat haduh ban da pynbna da kumwei pat, la pyntip ka Deputy Commissioner.
