Shillong, Nailar 03: Ka Jaiñtia Students Union (JSU) ha ka sngi Palei ka la aiti da ka dorkhas ha ka Myntri jong ka Sorkar Jylla ka Dr. Ampareen Lyngdoh ban pyntip halor ka jingbyrngem byrsit jong ki jaidbynriew Karbi ia ki Pnar kiba shong basah ha ka thain Block-I da kaba maham ba kim dei ban thaw ia kino kino ki kynhun sengbhalang ha kane ka thaiñ.
Ha ka jingiakren bad ki lad pathai khubor u President ka Seng u samla Trebor R. Suchen u la iathuh ba ka seng ka la kyntu ia ka Myntri ba kan pynsngew ia kane ka jingshah byrngem jong ki Khasi-Pnar kiba sah ha ki shnong kiba hap hapoh ka Block-I sha ki tyndong skhor jong u Myntri Rangbah ka Jylla u Conrad Kongkal Sangma ba un dup iakren bad u Myntri Rangbah ka Jylla Assam khnang ban pynneh ia ka shongsuk shongsaiñ ha ka thain Block-I.
Ha kajuh ka por, ka seng ka la pynsngew ha kane ka Myntri ka tnat ka Koit ka Khiah ia ki jingduna jong ka Khliehriat Civil Hospital.
U President ka JSU Khliehriat Circle u Bah Livingson Sama u la ong kumba ka long mynta kane ka Hospital kaba don ha East Jaintia Hills District ka dang don bun ki jingduna naduh ka um bam umdih, ki dawai ki dashin bad kiwei kiwei ki jingduna.
U la iathuh ba ka Dr. Ampareen Lyngdoh ka la pyntip sha ka Seng ba kan sa leit jurip ia kane ka Hospital ha ka 15 tarik u Nailar, 2023 ka sngi ba kan leit pynher ia ka lama lairong jong ka ri ha kane ka district ha ka jingrakhe ia ka sngi laitluid jong ka ri.
Shuh shuh ka seng ka la dawa ia ka Sorkar Jylla ba kan plie biang ia ka Centre thoh Eksamin jong ka Meghalaya Service Public Commission (MPSC) ha sor Jowai khnang ban pynsuk ia ki samla aplai kam jong ka West bad ka East Jaiñtia Hills District ha ka leit ka wan bad kan weng ruh ia kino kino ki jingeh ba ki nongaplai kam ki iakynduh ha ka bai kali.
Kane ka jingdawa jong ka Seng ka long hadien ba ka Sorkar ka la khang khyrdep ia ka jaka thoh eksamin khlem da ai ia kino kino ki daw kiba biang.
