Shillong, Naitung, 12: U District Magistrate jong ka West Khasi Hills District u Bah Garod LSN Dykes ha ka sngi baar u la pynjari da ka Section 144 CrPC ba la mana ban ialum briew hapoh ka jingjngai kaba 1 kilomitar ha ka jaka ba don ki karkhana saiñ dewiong beaiñ ha Kyllonmathei, Shallang, West Khasi Hills District.
Ha kane ka hukum, u District Magistrate ula pyntip ba la bthah ban pyndep ia ka jingpynpra ia ki Coke Plant be-aiñ ba la shna khlem jingbit hapoh ka District lyngba ka hukum, Order Memo No NDG 304/2020/Pt11/79-A dt. 02/02/2023 bad ka Sorkar Meghalaya ka la mynjur ban pynpra ia ki atoskhana jong ki Coke Plant beaiñ hapoh ka District lyngba ka shithi , letter FOR 2/202/302 dr.4/7/2023; bad ia ka jingbthah ban pynpra ia ki Coke Plant beaiñ hapoh ka District yn pyntreikam naduh ka 7/7/2023.
“Kam long kaba shngaiñ ba ki briew ki bym shym la iohbor ban rung ne ban iaid sha ki jaka ba don ki Coke Plant be-aiñ ha ka por ba pynpra,” la ong u District Magistate ha ka hukum.
“Namarkata, da kaba pyntreikam ia ka iktiar ba la pynkup ha nga hapoh ka Section 144 CrPC la mana ia kino kino ki riewshimet ne ki kynhun ba khlem ioh jingithuh ban tur hapoh ka jingjngai kaba 1 kilomitar na ka jaka ba don ki Coke Plant be-aiñ ha Kyllonmathei, Shallang, West Khasi Hills District,” la mana u District Magistate.
Kane ka hukum kan treikam noh mardor tad haduh ban da pynbna da kumwei pat.
