Shillong, Nailur, 20: Phra ngut ki Senior Journalist lane ki nongthoh khubor kiba la shakri palat 30 snem ha ka kam pathai khubor hapoh kane ka jylla, ha ka 20 tarik Nailur, 2024 ki la shah pynkup burom ha u Myntri Rangbah ka Jylla u Conrad Kongkal Sangma ha ka jingïalang 1st Media Meet ba la pynlong da ka ophis Directorate of Information and Public Relations ka Sorkar Jylla ha Vivanta, Shillong.
Kine ki phra ngut ki Senior Journalist kiba la shah pynkup burom ha kane ka sngi ha ryngkat ka jingsakhi lang jong ka Myntri kaba khmih ïa ka tnat Information and Public Relations ka Dr. Mazel Ampareen Lyngdoh, ki kynthup ïa u Bah Phillip Marwein uba dei u Editor jong ka Magazine Youth Today, u Subroto Bhattacharjee uba trei kum u Bureau Chief jong ka United News of India, u Bah R. Monarch Shabong uba dei u Editor jong ka kotkhubor U Rupang, u Bah Marcus M. Thaïang uba dei u Editor jong ka Kotkhubor bad Website Yutip, u Manas Choudhury uba dei u Editor barim jong ka Kotkhubor The Shillong Times, u Sanat Chakraborty bad ka Linda Chhakchhuak kiba dei ki Independent Journalist kynthup ruh u Sanjib Bhattacharjee uba long u Photographer lane u nongshon jong ka kotkhubor The Shillong Times.
U Myntri Rangbah ka Jylla uba la ai jingkren ha kane ka lympung ba nyngkong eh jong ki nonglum khubor ha kane ka jylla Meghalaya u la pynbna ruh ban ai jingïarap mar shi lak tyngka na ka Chief Minister Special Grant sha kine ki phra ngut ki nongthoh khubor kiba la shah pynkup burom ha kane ka sngi.
