Shillong, Jylliew, 11: Ka tnat Jngohkai Pyrthei ka Sorkar Jylla ha ka sngi Balang ka la pynkup burom ïa ki 36 ngut ki dkhot jong ki kynhun bapher bapher, kynthup ïa ki 42 ngut ki Pulit na ka State Disaster Response Force bad 11 ngut na ka tnat Pulit jong ka Sohra Police Station.
Ka jingpynkup burom ïa kine ki kynhun ka long halor ka jingïadon bynta jong ki ban leit wad haban da lap ïa ka metïap jong u Raja Raghuvanshi bad ïa ka kurim jong u, ka Sonam Raghuvanshi kaba ka la shah kem mynta ha ki Pulit, ha kine ki khyndiat sngi ba la leit noh ha ka thaiñ Sohra baroh kawei.
Ha ka jingïalang pynkup burom kaba la long ha ophis u SDO (Civil) Office ha Sohra la sakhi lang da u Myntri ka tnat Jngohkai Pyrthei u Bah Paul Lyngdoh uba la long kum u kongsan, u MLA jong ka Sohra Constituency u Bah Gavin Mylliem, u MDC ka Sohra u Bah Titostarwell Chyne, u Director ka Tourism u Bah Cyril V.D Diengdoh bad u SDO ka Sohra Civil Sub-division u Bah M. Challam bad kiwei kiwei.
U Bah Paul Lyngdoh haba kren kum u kongsan u la ban jur ïa ka jingdonka ka jngohkai pyrthei kaba don ka jingkitkhlieh bad pynbna ïa ki jingpynbha ba kongsan, kum ka jingpyndait ïa ki CCTV ha ki jaka jngohkai pyrthei ba kham kongsan, ka jingshna ïa ka rynsan die jingdie ba kyrpang hajan ka jingkieng Mawkdok ban kyrshan ïa ka kamai kajih jong ki trai shnong bad ban pynbha ïa ka rukom pynïaid ïa ka jingwan jong ki nongjngohkai pyrthei.
Ka tnad jngohkai pyrthei ka la wanrah ruh ïa ka Tourist Buddy Program ban ai jinghikai ïa ki nongïalam lynti (Guide) ba la ïoh jingithuh, bad ka MTIME App—ka rynsan digital na ka bynta ka jingpynrung kyrteng ba donkam ïa ki nongjngohkai pyrthei ka ban pynbha ïa ka jingïasam jingtip hapdeng ki nongjngohkai pyrthei, ki Pulit, bad ki bor synshar.
U Bah Paul u la sam ruh ïa ka khusnam pisa kaba mar T. 15,000 marwei sha ki 36 ngut ki dkhot na ka Tour Guide Association, Central Body bad Sohra Unit, ki local Guide, ki dkhot jong ka West Jaiñtia Hills District Adventure Sports And Mountaineering Club bad ki dkhot jong ka Sohra Taxi Owners Association.
Nalor kine, la sam ruh ïa ki syrnot sha ki 42 ngut ki Pulit na ka State Disaster Response Force bad 11 ngut na ka tnat Pulit jong ka Sohra Police Station.
