Shillong, Jylliew, 24: Ki MDC jong ka Liang ïatei ka Khasi Hills Autonomous District Council (KHADC) kiba la mih jyndat na ka dorbar lyiur jong ka iingdorbar ka Council, mar mar ki la leit ban ujor sha u Symbud Myntri Rangbah ka Jylla uba khmih ïa ka tnat District Council Affairs u Bah Prestone Tynsong halor ka jingwanrah jong ka Executive Committeee jong ka Voice of the People Party ïa ka Supplementary Budget khlem pat mynjur shwa ïa ka mang tyngka ba pura bad ka jingleh donbor da kaba wanrah ïa ka voting khnang ban ïoh ïa ka jingmynjur.
Ha ka jingïakren bad ki lad pathai khubor u nongïalam jong ka liang ïatei u Bah Titostarwell Chyne u la ïathuh ba ka liang ïatei ka la ailad ba ka Executive Committee kan pynbeit ïa ka jingbakla hadien ba la pynsangeh shwa ïa ka jingïashong dorbar hynrei ynda la wan phai biang shapoh ka iingdorbar u la kynnnoh ba ka Executive Committee ka la shu leh donbor da kaba shu wanrah ïa ka voting tang namarba ka Voice of the People Party ka don ïa ka jingbunpaid ha Khasi Hills Autonomous District Council.
