Shillong, Jylliew 13: Ki nongtrei kiba la shah wengkam noh ha ka Executive Committee ba la ïalam da ka Voice of People’s Party (VPP) ha KHADC ha ka sngi Thohdieng ki la leit ban bteng biang ïa ka kam jong ki hadien ba ki la ïoh ïa ka jingpynsangeh ba shipor na ka Ïingbishar Meghalaya High Court ïa ka hukum ba la pynmih da ka KHADC.
Ki ki nongtrei kiba don kumba 27 ngut kiba trei ha ki Permanent Post ki la leit ban kynduh ïa u Secretary ka Council u Bah D. G Syiemïong ban aiti ïa ki kot ki sla kiba ïadei bad ka hukum ba la ïoh na ka Ïingbishar ha kaba u Secretary u la pdiang bad soi ruh ïa ki kot ba ki la aiti sha u.
Kum ban shu pynkynmaw ba dang kumba shi taïew tam ka KHADC ka la weng kam ïa kiba trei Permanent bad ailad ba ki dang lah ban bteng kum ki nongtrei Casual.
Haba ïakren bad ki lad pathai khubor u Bah J Thabah u la pynpaw ka jingai burom sha U Blei nongbuh nongthaw uba la plie lad biang ïa ki ban ïoh bteng biang ïa kane ka kam kaba ki la trei baroh shi katta bad u la ai khublei ruh ïa ka High Court kaba la pynneh ïa ka kam da kaba pynsangeh noh ïa ka hukum jong ka KHADC kaba la pynsangeh kam ïa ki.
“Ha kane ka taïew ba la dep ngi la shah wengnoh na ka kam Permanent bad la bthah ïa ngi ban trei noh da ka kam Casual, hynrei ngi ki rit ki ria shisien ba la ktah hi ïa ka pliangja jong ngi, ngi hap ban ïakhih bad ynda la leit sha High Court ka la pynmih noh da ka stay order bad mynta ngi la bteng ha ki juh ki post ba la trei baroh shi katta,” ïathuh u Bah Thabah.
U la ong ruh ba na ka liang jong ki, ki la leit ïakynduh tang ïa u Secretary hynrei ki khlem leit satia ban kynduh ïa u CEM KHADC. “Na ka liang u Secretary ruh u la soi bad u la pdiang ruh ïa ki kot ki sla jong ngi, kumta ngi pynpaw ka jingsngewnguh kaba khraw ruh ïa u Secretary ba la sngewthuh ïa ngi ki samla kiba don ha ki jingeh jingjynjar kumta la shimkhia ïa kane ka kam ha kti la jong,” u la pynpaw.
Halor kiwei pat kiba trei Casual kiba la shah wengkam lang kiba khlem leit pynpaw hakhmat ka Ïingkashari, u Bah Thabah u la ong, “Haba ïadei pat bad kiwei pat kiba khlem leit lang sha High Court ngin sa ïapeit hadien namar ka por ruh ka dang jrong, ka dang don ka jingïakren bad kane ka kam ka dang ïaid shakhmat.”
“Ngi mynta ngi la bteng ban trei biang ïa kane ka juh ka kam bad ngi kyrmen ruh ïa baroh ba ki dei ban ïoh biang ïa kajuh ka hok, namar kumba la mih ki jingkynthoh ha ki Social Media ba la thung kam tuh bad sop sop ïa ngi, hynrei kane kam long satia kumta bad lada tih jylliew bha phin lap ïa ki jingshisha ba kumno ngi hap ban trei shitom ban ïoh ïa kane ka kam bad ba ngi wan ruh na ki longïing kiba jynjar suda bad mynta haba ngi la ïoh biang ïa kane kam ka dei ka jingkyrkhu ba la ai da U Blei najrong, namar lada shah knieh noh ktah bha namar ym tang ma ngi kiba ïap ja namar bun na ki bahaïing jong ngi ki dang ap na kane ka kam kaba ngi trei, kumta ngi ai ka jingsngewnguh kaba khraw tam sha U Blei uba la leh ïa kane ka kam kaba ratbah,” bynrap u Bah Thabah.
Kumta u la kyrpad ïa baroh ban don ka jingsngewthuh jingmut ym ban ibeiñ than iwei ïa iwei bad ban pyrshang ban wanrah ka jingïatylli hapdeng ki para Khasi.
Haba kylli halor ki jingong u CEM ba ka jingweng ïa ki, kadei bym don ka sanction Post, u Bah Thabah u la ong ba lada ka long kumta na ka liang ka Ïingbishar ruh kan ym pynmih satia ïa kane ka hukum hynrei ka la pyndep ïa ka kamram ha lade bad shisien ba la leit sha Ïingbishar ka hok ka don.
Halor ki jingshah kynnoh ba ki la ïoh ïa kitei ki kam da kaba pynbam pisa, u Bah Thabah u la ong, “Kum ki rit ki ria naei keiñ ngin ïoh pisa ban pynbam ïa ki heh ki haiñ hynrei dei na kine ki kam barit ba ngi la lah ban pyndap ha la ïing ha la sem.”
