Shillong, Nailar, 29: Ki MLA jong ka Voice of the People Party (VPP) ha ka sngi Palei ki la mih jyndat na Ingdorbar Thawaiñ kum ka jingpyrshah ïa ka rai ba la ailad ïa u Myntri ka tnat Pule Puthi u Rakkam A. Sangma ban jubab hapoh ka Ingdorbar Thawain khlem ka jingpynshitom pyrshah ïa u halor ka jingkynnoh ba u donkti ha kaba kren ïa ki ktien ba wanrah ka jingisih.
Tang hadien ba Deputy Speaker u Timothy D. Shira u la pynbna ïa ka rai jong u ban ailad ïa u Myntri ka tnat Pule Puthi ban jubab ïa ka Short Duration Discussion ba la wanrah da u nongïalam ka VPP u Bah Ardent M. Basaïawmoit uba dei ruh u MLA na Nongkrem halor ka jingthung nonghikai ha Dadenggre Sub-Division ha Assembly, u Bah Ardent ryngkat bad lai ngut ki MLA jong ka VPP ki la ieng mardor na la ki jaka shong bad ki la mih noh napoh ka Ingdorbar da kaba ong ruh “ka jinglehraiñ, ka jingehraiñ.”
Shuwa ban mih jyndat, u Bah Ardent u la ong, “Ngan ym sngap ïa u Myntri ka tnat Pule Puthi. (Ka jingkren isih jong u) ka long ka jingpynkheiñ pyrshah ïa ka kyndon 196 jong ka BNSS. Lada u Myntri Rangbah ne uwei na ki Symbud Myntri Rangbah kim kren ïa ka mat ngan nym sngap.”
U la byrngem ruh da kaba ong, “lada ka Sorkar ka ailad ïa u (Myntri) ban jubab, ngin hap mih noh. Ngim kwah ïa kano kano ka jingïaleh hapdeng ki Khasi bad ki Garo. Ka jingkren jong u ka pynmih ïa ka jingshun hapdeng ki ar jaitbynriew.”
Shwa ïa kane, u Symbud Myntri Rangbah Bah Prestone Tynsong u la ong ba ki kyndon ki ong katba u dang ai jingkren ym dei ban kynthoh shimet pyrshah ïa u dkhot.
“Kumta nga la pyrkhat ba ngi ailad ïa u Myntri ban jubab namarba u MLA ka Nongkrem u Ardent Bassaïawmoit u la ieng bad u la kynthoh ruh ïa kane, nga kwah ban pynbeit ïa kiei kiei ba ki jingkynnoh (pyrshah ïa u Myntri) ki long kiba ktah shimet palat. Kumta ngin weng noh ïa kata ka jingkren,” la ong u Symbud Myntri Rangbah.
U la ai jingmut ruh ïa u nongïalam jong ka VPP ai ba ka ain kan shim ïa la ka jong ka lynti namarba ki la dep ban ujor da ka ejahar pyrshah ïa u Myntri.
Katkum ka jingong jong u, ka VPP ka wanrah ïa kane ka mat hapoh ka Iingdorbar khlem kano kano ka kyndon.
“Balei ngin wanrah ïa kane ka mat hapoh ka Iingdorbar. Ngi dei ban bat ïa ki kyndon. Kane ka dei ka jingkynnoh shimet pyrshah ïa u dkhot, uba dei ruh u Myntri ha ka Sorkar,” la pynpaw u Symbud Myntri Rangbah.
