Shillong, Naitung 29: Ka Myntri ba khmih ïa ka tnat ki Kam Rep ka Kong Ampareen Lyngdoh ha ka sngi baar ka la mih na la ka kamra treikam bad ban kynduh ïa ki nongrep ha State Central Library hadien ba khlem shah ïa ki ban ïalum paidbah hakhmat ka Secretariat na ka daw ka jingpynjari da ki kyndon ban khang ïalum paidbah ha katei ka jaka.
Ki nongrep hapoh ka shatri jong ka seng Hill Farmers Union (HFU), ki la leit tur sha Secretariat ban pynpaw ïa ki jingeh jong ki sha ka Myntri ka tnat Rep.
Hynrei na ka liang ki bor pynïaid ki la pyrkhing ïa ki ban rung shapoh Secretariat, haba ki la shah tang ïa ki nongïalam ban kynduh ïa ka Myntri.
Shen hadien ka jingïalang kaba la neh ar kynta bad ki nongïalam ka HFU, ka Kong Lyngdoh ka la rai ban kynduh lang ïa baroh ki nongrep kiba la ap ha State Central Library bad ka la panmab ruh na ki halor ki jingeh ba ki la mad. Ka la pynthikna ïa ki nongrep kan sa pynbeit ïa kine ki jingsngewkhia kaba ki ïakynduh.
Ka Myntri ka la pyntip ba ka la pynlut haduh 2 kynta ka por ban ïasyllok ïa kiba bun ki mat kiba la mad da ki nongrep bad la ïakren ïa kine bad ki nongïalam jong ki.
“Nga panmab ba ym lah ban shah ïa phi baroh ban rung ha secretariat naba ngim don ruh ka jaka kaba heh ban pynrung ïa bun ngut. Kumta ki nongïalam ki la dep ban aiti ka shithi sha nga. Ngi la shong la jan 2 kynta ban ïasyllok ïa kiba bun ki mat ba phi la ïakynduh bad mad. Nga panmab naba bun naphi, phi hap ïa ap hangne naba ngi hap ban burom ïa ka aiñ ba la pyrkhing bad khang ka jingïalum paidbah hakhmat ka secretariat. Wat pyrkhat ba ka sorkar kam sngewthuh ïa ki jingeh jong phi,” ong ka kong Lyngdoh, ha kajuh ka por ka ai khublei ïa ki nongrep ïa ki jingsngewthuh bad jingïatreilang jong ki.
