Shillong, Rymphang, 11: Ka Proseshon Iukharist Mawkynrew Parish kaba shisien shisnem mynta ka la thaw histori ha ka Parish namarba ki sur bang sur thiang ki jingrwai ki paid U Blei naduh ka Dohnud.
Ïa ka Proseshon Iukharist jong ka Holy Cross Mawkynrew Parish la pynlong ha Balang Shnong Laitmynsang ha ka 9 tarik mynta u bnai ba la sdang da ka Mass Bakhuid ha ka por mynstep ba la tyrwa da u Fr. Bilingshar Syiemlieh ryngkat ka jingsynran lang jong u Parish Priest u Fr. John Baland bad kiwei pat ki Lyngdoh Sohblei.
Ha ka Mass Bakhuid la ai ïa ka Kommunion banyngkong sha ki heprit.
Ha ka por nohphai sngi la sdang ïa ka jingïaid Proseshon tawiar ka shnong ha kaba la rah ruh ïa ka Sakrament Iukharist bad la pynkut pat da ka jingmane ïa ka Sakrament Bakhuidtam ka Duwan.
Kawei ka khubor kaba sngewtynnad ïa ka Parish Mawkynrew ka long ba kawei ka kynhun tem kaba ai kyrteng “Ka Sur Pynbang Pynthiang” na ka Balang Shnong Umsawwar ka la sei ki riewdonsap ban tem ha jingïaid Proseshon Iukharist da ki jingtem tynrai ba ju tem ki menbarim.
Kane ka kynhun tem na ka shnong Umsawwar ka la pyndonkam ïa ki jingtem kum ka Violin, Mandalin, ka Guitar bad ka Drum ka la sdang nyngkong eh ïa ka jingtem bad jingrwai ha ka Proseshon ha ka sien banyngkong eh.
Lehse ka dei ka kynhun tem ba nyngkong eh ha Jylla Niambah Shillong ban don ka jingtem sur niam da ki jingtem tynrai na ka shnong kyndong ha Parish Mawkynrew kaba dei ka jingtem shnong kaba shong shit jong ki nongshong shnong haba don ka jinglehkmen shisien shisnem bad kaba ju pyndonkam ha ki jaka rep ban rep.
Ïa kine ki jingtem la ju tem ruh ha ki lyngwiar dpei iing ban sneng ban kraw ïa ki khun ki pyrsa.
Ka kynhun tem na Balang Umsawwar ka dei ka kynhun tem kaba la don la slem bah la kyrkhu kyrdoh da u Fr. Billingshar Syiemlieh.
