Shillong, K’lyngkot, 27: Kumba 23 ngut ki Active Member bad ki Primary Member jong ka Voice of the People Party, Nongstoiñ Constituency ha ka Lah Sngi u Blei ki la shim ïa ka rai ban iehnoh ïa ka jinglong dkhot jong ki na ka VPP namar ka jingbymihun shuh ïa ka rukom treikam jong kane ka party ba la ïalam da u Bah Ardent M. Basaïawmoit kum u President.
U Secretary jong ka Election Committee ka VPP Nongstoiñ Constituency u Bah Kyntiewbor Kharsohphoh ha ka jingïakren bad ki lad pathai khubor u la ong ba ka jingshim jong ki ïa kane ka sienjam ka dei halor ka nongrim ba ki la shah thok ha u President Rangbah ka VPP u Bah Ardent Basaïawmoit.
Shuh shuh u la ong ba u Bah Ardent u la kren shai ha kaba ïa ka ticket MDC na Nongstoiñ hadien ba la pynduh ïa u Marbiang Nongsiej yn ai noh sha kiwei pat kiba la aplai ïa ka ticket hynrei ïa kata ruh um shym la leh bad khlem da kynjoh wat tang shikyntien ruh pynban ïa ka ticket la ai noh sha uwei pat u bym dei satïa u dkhot jong ka VPP bad uba khlem aplai hi ruh wat ïa ka ticket.
Kine ki dkhot ba la iehnohkam na ka VPP ki la pynpaw ruh ba kim dei ki briew jongno jongno hynrei ki dei ki briew jong ka VPP bad ki la ong ruh ba ïa mynta kim pat don kano kano ka jingthmu ban leit ïasoh sha kiwei ki party ne ban leit kyrshan ïa kino kino ki kyrtong.
