Shillong, Risaw, 28: U Vice President jong ka All India Trinamool Congress, Meghalaya u Zenith Sangma ha ka sngi Baar u la phah ïa ka shithi ban pyntip ba u la iehnoh ïa ka kam Vice President jong ka party bad kum u dkhot jong ka party bad leit pynïasoh biang sha ka Indian National Congress (INC).
Ha ka shithi ba la phah sha u Bah Charles Pyngrope uba dei u President jong ka AITC, Meghalaya, u Zenith u la ong, “hadien ba la pyrkhat sani bha, nga la rai ban resaiñ na ka kam Vice President jong ka Meghalaya Trinamool Congress bad kumjuh ruh kum u dkhot ka party naduh kane ka sngi.”
“Kam dei satia ka rai kaba suk. Nga la ïoh mad bun ki jingmyntoi ha ka jingïaid lynti jong nga bad ka AITC, ki jinghikai bad ki jingsah kynmaw. Ngan ïai sngewnguh borabor ïa ka jingshaniah, ka jingkyrshan bad ka jingïadei paralok kaba nga la ïoh na ki paradkhot, ki nongtrei bad na ki nongkyrshan ha ki samoi ba nga la don hapoh ka party,” u la bynrap.
“Hynrei, nga ngeit ba ha manla ki bynta jong ka jingim ka don ïa ka por bad ka jingthmu. Mynta, nga sngew ba ka la dei ka por ïa nga ban ïaid shakhmat bad ban sdang ïa ka lynnong kaba thymmai, kata, ka dei kaba ïasoh khamjan bad jingangnud shimet jong nga bad ka jingangnud kaba nga don na ka bynta ban shakri ïa ki paidbah,” u la ong shuh shuh.
“Nga phah ïa u kyrwoh jingsngewnguh sha ki nongïalam ka AITC bad sha ka AITC Meghalaya, na ka bynta ki lad ki lynti ba ki la ai ïa nga bad nga kyrmen ba ka party kan dang ïai bteng ïa ka mishon ban shakri ïa ki paidbah jong ka thaiñ bad ïa ka ri baroh kawei,” u la pynkut.
Ka All India Congress Committee (AICC) ka la mynjur ïa ka jingwan phai biang jong u Zenith, da kaba ïoh pdiang ïa ka shithi na u AICC in-charge Meghalaya u Dr. A. Chella Kumar uba la pyntip ïa u President ka MPCC u Bah Vincent H Pala halor kane ka rai.
“Kane ka long ban pyntip ïa phi ba ka President jong ka Congress ka la mynjur ïa ka jingtyrwa jong u Zenith Sangma ban pynïasoh biang sha ka Indian National Congress,” la ong u Dr. Chella Kumar.
Ka jingleit phai biang jong u Zenith sha ka Congress la ïohi ba kan long kum ka jingpynim biang ïa ka party ha rilum Garo, shwa ka elekshon sha ka Ïingdorbar Thawaiñ ka ban sa long ha u snem 2028.
