Shillong, ïaïong, 02: Ka Dorbar Shnong Wapungskur, East Jaiñtia Hills District ha ka sngi Balang ka la ieng pyrshah ïa ka jingthmu ban shna ïa ka karkhana Coke hapoh u pud u sam jong ka shnong.
Kane ka la jia hadien ba ka Meghalaya State Pollution Control Board (MSPCB) ha ka 7 tarik, Lber ka la ai ïa ka Consent to Establish (CoE) sha ka Om Om Coke ban tei ïa ka LAM COKE Manufacturing Unit kaba don tang uwei u atoskhana ha Thlakuru, Mookhep kaba dei ka projek kaba kot T. 4.50 klur.
Ka Consent to Establish (CoE) ka treikam tang haduh ka 28 tarik, Rymphang, 2026 hynrei lym kumta yn pyndam noh. Ka por ban pyntreikam ïa ka CoE lah ban pynjlan lada i donkam tad haduh ka por ba ka karkhana ka la long kaba kloi ban pynmih ïa u mar
Ka Dorbar Shnong jong ka shnong Wapungskur ba la lamkhmat da u Waheh Shnong u Bah Postling Dkhar tang shu ïoh jingtip halor kane mar mar ki la leit jurip ïa ka jaka ba la ai CoE katkum ka No objection Certificate (NOC) ba la ai da ka shnong ba marjan ka Dorbar Shnong Mookhep bad lap ruh ba kane ka jaka ka dei kaba dang hap hapoh u pud u sam jong ka shnong Wapungskur.
“Nga sngew kyndit shikatdei ei ïa kane ka jingleh bym lah ban pdiang da u Waheh Shnong jong ka shnong Mookhep. Watla u tip bha ba ngi don ïa u pud u sam, hynrei u la ïaid shakhmat ban ai NOC na ka bynta ban shna ïa ka karkhana Coke ha jaka jong ngi,” ong u Bah Dkhar.
“Namarkata, ngi la wan hangne mynta ka sngi ban pynpaw ïa ka jingpyrshah kaba jur ïa kane ka jingkyntur jaka beaiñ sha u pud u sam jong ngi da ka shnong ba marjan. Kane ka jingleh ka long kaba be-aiñ,” u la bynrap.
Katkum ka jingong jong u, ka jaka ba la thmu ban shna ïa ka karkhana Coke ka dei ka jaka khlaw kaba hap hapoh ka jingpeit jingsumar jong ka Dorbar Shnong Wapungskur bad ka dei ruh kaba don shajngai na ka shnong Mookhep.
U Waheh Shnong jong ka shnong Wapungskur u la pyntip ruh ba ha ki snem baladep, ka Dorbar Shnong ka la kyntait mardor ïa kiba bun ki jingkyrpad ban shna ïa ka karkhan Coke hapoh u pud u sam jong ka shnong na ka bynta ka bha ka miat jong ki paidbah nongshong shnong namarba ka jingdon ki karkhana kan pynjaboh ïa ka lyer bad ïa ka mariang.
“Na kata ka daw, ngi la rai ban wan mynta ka sngi sha kane ka jaka ban pynthikna ba ngin ym ailad ban shna ïa ka karkhana Coke hapoh u pud u sam jong ka shnong,” ong u Bah Dkhar bad dawa ïa ki trai karkhana ba kin leit shna karkhana sha kiwei pat ki jaka ym hapoh u pud u sam jong ka shnong Wapungskur.
