Shillong, Naitung, 21: Ka kmie jong ka samla Eniba War ka samla kaba la pawnam bha ha ka jingrwai Khon u Woh, ka la mudui da ka ejahar sha ki Pulit ka Jowai Police Station pyrshah ïa ki briew kiba pynthohbria bad kiba pynbudnam sniew ïa ka da kaba pynsaphiang ïa ka video jong ka phlim awria kaba san snem mynshwa da kaba kynnoh ba ka dei ka samla Eniba War kaba la shah ring dur ha kane ka video.
Ka jingujor ejahar sha ki Pulit ka long ba ha ka 10 tarik mynta u bnai hadien ba kawei ka Facebook Account kaba la ai kyrteng Grace Nakhim ka la pynsaphriang beaiñ ïa ka video awria da kaba buh ïa ka dur jong ka Eniba.
Ki bahaiing hasem ki la kyrpad ïa ki Pulit ba kin pynlong ïa ka jingtohkit kaba bniah bad ban kem mardor ïa ki briew kiba donkti ban pynthohbrïa bad ki la kyntu ïa ki paidbah ba kim dei ban shu ngeit kulmar ïa kine ki jingïalam bakla.
“Kato ka video ba la pynpaw ha ka Social Media ngam dei satia ma nga. Kato ka video ka dei kaba la thep naduh san snem mynshwa ha ka Adult Site. Na ka liang jong nga nga sngewdiaw ba ki don ki briew kiba pynbudnam sniew ïa nga. Ka jingleh jong ki, ka pynmong haduh katta katta ïa nga, ka ktah ïa ka mynsiem bad kumjuh ruh ïa ka lawei jong nga, la ong ka samla Eniba War ha ka jingïakren bad ka Batesi Tv ha ka Lah Sngi u Blei.
“Lada don kino kino kiba pynpaw ïa ka dur jong nga ha kato ka video kin ngat ha ka kti jong ka aiñ. Nga kyntu ïa ki para samla ba kin don ka jingkitkhlieh bad ym don ïa ka mynsiem atnud ne ka mynsiem bishni khnang ban ïa bha ha ka shnong ka thaw bad ka imlang ka sahlang,” la kyrpad ka samla Eniba.
Ka kmie ka la pynpaw ïa ka jingsngewdiaw ïa ka jingshah pynbudnam siew ïa ka khun kynthei jong ka.
U Mama u la ong ba ka kane ka jingpynbudnam sniew ka la ktah haduh katta katta ïa ka pyrsa jong u ka Eniba War.
U la kyrpad ïa ki paidbah ba ki dei ban don lem ïa ka jingkitkhlieh bad ban da bishar sani bha bad ba kim dei ban shu shah ïalam ha ki khubor hamsaïa.
